Kòrsou a partisipá na ‘Expo Internacional Bolívar’

WILLEMSTAD- 10 di ougùstùs 2015 – Resientemente Kòrsou a partisipá na ‘Expo Internacional Bolívar’. E feria turístiko a tuma lugá den Centro Total de Entretenimiento Cachamay na Puerto Ordaz, Venezuela. Ofisina di Turismo di Kòrsou (CTB) por mira bèk riba un partisipashon eksitoso.

E promé edishon di e feria a konta ku un total di 380 booth kaminda empresario i representante di diferente sektor a ekshibí nan produkto i servisio na esnan ku a bishitá ‘Expo Internacional Bolívar’. Papagayo Beach & Lounge Resort, San Marco Hotel & Casino, Veneto Casino and Holiday Beach Resort, Renaissance Curaçao Resort & Casino, Curaçao Marriott Beach Resort & Emerald Casino i Piscadera Harbor Village a djòin CTB pa brinda tur ku ta deseá di bishitá Kòrsou informashon importante pa nan estadia. InselAir tambe a forma parti di e tim di Kòrsou komo e úniko aerolínea internashonal ku ta brinda buelo direkto pa Kòrsou for di Puerto Ordaz.

E partisipashon di Kòrsou tabata pa enkurashá i fortifiká interkambio kultural i ekonómiko, ekshibí Kòrsou komo hòp di Latino Amérika i Karibe i presentá e kuantioso aktividatnan turístiko ku nos isla tin pa ofresé. Ademas di esaki tabatin vários konferensha i foro. Nan a keda repartí den dos sekshon. E promé sekshon tabata dirigí riba e potensial di estado Bolívar i e di dos sekshon a enfoká riba turismo, komersio i agrikultura.

Pa CTB partisipashon na e ‘Expo Internacional Bolívar’ tabata un bon oportunidat pa por a ekshibí e oportunidatnan turístiko ku Kòrsou ta ofresé na bishitantenan for di eksterior.