Kòrsou a partisipá na Internationale Tourismus Börse (ITB)

WILLEMSTAD – 22 mart 2016 – Resientemente, Kòrsou a partisipá na Internationale Tourismus Börse (ITB), konosí komo e feria empresarial di mas grandi na mundu. Anualmente mas di 120.000 bishitante komersial i 50.000 bishitante públiko ta akudí na e feria ku ta tuma lugá na Messe, Berlin. ITB ta keda konsiderá komo un di e plataformanan empresarial mas importante den industria turístiko. Meta prinsipal di Kòrsou su partisipashon na ITB tabata pa estrechá lasonan empresarial, hasi mas promoshon pa nos pais i negoshá kontraktnan nobo.

Representantenan di Kòrsou a sá di brinda bishitantenan un ñapa di loke nos isla ta ofresé komo destinashon turístiko. Durante di e feria a ekstendé un invitashon na partnernan importante den industria pa bishitá e stènt di Kòrsou. E tim di Kòrsou a hasi uso di e oportunidat tambe pa sera konosí ku potensial partnernan nobo ku den futuro por tin un impakto positivo pa nos isla. Tambe e tim di Kòrsou a mustra miembronan di prensa, bishitantenan komersial i públiko general un video di introdukshon basá riba un eksperensia virtual real di Kòrsou. Finalmente, tabatin oportunidat pa tene reunionnan privá na unda un biaha mas e tim di Kòrsou por a interkambiá riba diferente tópikonan di interes ku e presentenan. E merkado europeo ta keda un merkado hopi importante pa Kòrsou.

Un danki ta bai na e partnernan di sektor privá ku a forma parti di e tim di Kòrsou kualnan ta: ACOYA Resort, Avila Beach Hotel, Blue Bay Golf & Beach Resort, Chogogo Resort, Curaçao Marriott Beach Resort and Emerald Casino, Floris Suite Hotel, Hilton Curaçao, Lions Dive & Beach Resort Curaçao, Livingstone Jan Thiel Resort, Morena Eco Resort, Rancho El Sobrino, Renaissance Curaçao Resort & Casino, Santa Barbara Beach & Golf Resort i Sea Aquarium Park.