Kòrsou a partisipá na ‘Vitrina Turistica ANATO 2016’

...Presensia di Miss Universe Curaçao srta. Kanisha Sluis a hala hopi atenshon pa Kòrsou...
WILLEMSTAD- 4 di mart 2016 - Tur aña di nobo Kòrsou ta partisipá na ‘Vitrina Turistica ANATO’ na Bogota, Colombia. E aña aki tabata e di 35 edishon kual a tuma lugá na Corferias, Bogota Colombia. Durante dianan 24, 25 i 26 di febrüari último Ofisina di Turismo di Kòrsou (CTB) a forma parti di e feria di turismo ANATO. Ta trata aki di un feria na kual mas di 30 pais ta partisipá pa asina promové nan destinashon. ANATO ta e plataforma perfekto pa interkambiá ku partnernan importante den e mundu di turismo manera aeroliñanan, agentenan di biahe i operadornan di tour. Mas di 30.000 persona a bishitá e feria. E aña aki e booth di Kòrsou a konta ku presensia di nos elegante Miss Kòrsou, srta. Kanisha Sluis kual sigur a hala atenshon pa Kòrsou.

Srta. Kanisha Sluis, tòp 10 finalista di Miss Universo 2015 a interkambiá ku bishitantenan durante di e dia di apertura di e feria i manera un bon embahadora e tabata saludá i saka potrèt ku tur ku tabata aserk’é. Tambe el a sa di hala atenshon di media ku tabata presente na e feria. Tur ku a bishitá e boothdi Kòrsou a keda impreshoná pa e kuantioso posibilidatnan ku Kòrsou ta ofresé durante henter aña komo destinashon karibense. Un biaha mas partnernan den nos industria turístiko lokal a forma parti esensial di Kòrsou su partisipashon durante ANATO 2016, e aña aki a konta ku partisipashon di: Curacao Marriott Beach Resort & Emerald Casino, City Suites Curaçao, Livingstone Janthiel Resort Curaçao, ACOYA Hotel Suites & Villas, InselAir, Sunscape CuraçaoResort, Spa & Casino, Hilton Curaçao, Holiday Beach Hotel and Venetto Casino, Papagayo Beach Hotel, Santa Barbara Beach & Golf Resort Curaçao, Business Serenity & Tours, Scooby Tours, Sambil Curaçao, Curaçao Airport Partners i CHATA. Kòrsou tabatin un booth di dos piso den e sala prinsipal di e feria. E parti abou a keda usá pa e tim di Kòrsou duna informashon di nan produkto i servisionan i e di 2 piso a fungi komo área di negosiashon na unda ku e partnernan por a tene reunionnan di benta i kòmbersashonnan privá. Tambe a hasi uso di e oportunidat pa promové e diferente eventonan ku lo bai tuma lugá na Kòrsou próksimamente.