Kòrsou partner mayó den promoshon pa American Airlines Vacations (AAV)

...A bishitá 9 suidat merikano durante e trayekto di promoshon...
WILLEMSTAD- 16 yüni 2015– Ofisina di Turismo di Kòrsou (CTB) i Curaçao Airport Partners (CAP) ku orguyo a kolaborá na e trayekto di promoshon i introdukshon di e produkto renobá di US Airways / American Airlines kual ta American Airlines Vacations (AAV). Komo parti di e trayekto a hasi un rekorido na 9 suidat merikano. For di e union di US Airways i American Airlines, nan a bira e kompania di aviashon di mas grandi na mundu ku mas ku 6,700 buelo diario pa 336 destinashon den 56 pais. Ademas di e evento di introdukshon di e produkto nobo a presentá seshonnan informativo tokante Kòrsou komo destinashon turístiko na Apple Vacations i GOGO Worldwide Vacations kombiná ku eventonan di relashon públiko na Dallas Texas i tambe kòmbersashon di benta ku agensianan di biahe lokal. A selektá siudatnan stratégiko pa hasi e trayekto di promoshon; Arlington, Dallas Texas, Philadelphia, PA - Long Island, NY- Washington DC, Charlotte, NC- Ft. Lauderdale, FL-Miami i Chicago- Illinois.

E promé suidat ku a bishitá tabata Fort Worth, Texas kaminda aproksimadamente 100 agente di biahe a presensiá e evento huntu ku 60 proveedor demostrando nan sosten na introdukshon di e AAV nobo. Debí ku Kòrsou tabata un di e dos partnernan prinsipal, CTB tabatin e oportunidat di showcase nos isla den un forma eksitante i edukativo. Tambe a bishitá Dallas, Texas kaminda a akomodá 140 agente di biahe i proveedornan durante di e evento di introdukshon di e AAV nobo. Ademas di esaki, tabatin un almuerso informativo ku a konta ku 10 eskritor di biahe, periodista i ‘bloggers’. Na Philadelphia CTB a uni ku sr. Ryan Lettow representante di Travel Impressions, ku a asistí e tim den algun kombersashon di benta den e parti nòrt di Philadelphia serka 5 diferente agensia di biahe. E introdukshon di AAV na Philadelphia a tuma lugá na Sheraton Philadelphia na unda a konta ku asistensia di mas ku 180 agente di biahe. E evento a kuminsá ku un presentashon kaminda e agentenan di biahe a topa ku 50 diferente representante di benta. Despues di esaki a tuma lugá un sena kaminda CTB a duna un presentashon di e produkto ku Kòrsou ta ofresé.

E siguiente dianan e tim a bishitá Long Island New York, Washington DC i Charlotte NC. Akinan tambe e eventonan di introdukshon di AAV a keda bon bishitá i Kòrsou a sobresalí ku su presentashonnan. Charlotte NC ta e kas di US Airways. E suidat aki a kibra rekòrt ku presensia di no ménos ku 200 agente di biahe. Tambe a bishitá Ft. Lauderdale Florida i Miami. E promé di e dos eventonan den sur di Florida a tuma lugá na Hyatt Pier Sixty Six yamando bon bini na 75 agente di biahe. Pa ámbos evento den sur di Florida, CTB a keda kompaña pa Avila Hotel. E evento na Miami a konta ku asistensia di aproksimadamente 85 agente di biahe. Na Miami tambe Kòrsou a sobresalí ku su presentashon klousurando esaki ku un oportunidat di oro pa e públiko presente, ku por a gana un estadia di 3 anochi na Avila Hotel mas 70.000 ‘air miles’ pa kortesia di AAV. A finalisá ku un bishita na Chicago, Illinois kaminda a duna un presentashon i rekordá tur invitado riba e produkto ku Kòrsou ta ofresé.

CTB ta gradisí tur hotèl partisipante i CAP ku a djòin e eventonan den kuadro di lansamentu di e produkto di AAV. Ku e kompromiso aki CTB a demostrá su sosten no únikamente na American Airlines pero tambe na e American Airlines Vacations (AAV) nobo.