Kòrsou presente na feria di buseo ‘Duikvaker’

WILLEMSTAD- 10 di febrüari 2015– Resientemente Ofisina di Turismo di Kòrsou (CTB) huntu ku diferente partner a partisipá na e feria ‘Duikvaker’ kual ta dediká na buseo i snòrkel. E feria a tuma lugá na Expo Houten na Hulanda. Durante di e feria e bishitante tabatin e oportunidat pa tuma informashon na e diferente stèntnan di e destinashonnan presente i tambe e amante di buseo por a kumpra ekiponan di buseo i snòrkel. Kòrsou a hasi bon uso di e oportunidat aki pa presentá e sitionan di buseo mas popular riba nos isla.

Durante di e feria Kòrsou a keda bon representá dor di vários skol di buseo ku a eksponé tur loke Kòrsou tin pa ofresé na e turista sambuyadó i tur esnan ku ta snòrkel.Tur ku sambuyá òf snòrkel den awanan di Kòrsou ta keda altamente impreshoná pa e naturalesa vírgen ku tin den nos awanan. Kòrsou ta brinda mas ku 65 lokalidat kaminda por praktiká buseo òf snòrkel. Kada sitio ta úniko den su sorto, tin su propio beyesa i variashon di koló. Esaki ta e sentimentu ku CTB i su partnernan kier a traspasá na e bishitantenan di ‘Duikvaker’.

Turismo di buseo ta un grupo masha importante pa CTB. Ku presensia di Kòrsou na ‘Duikvaker’ a konvensé e turista ku Kòrsou tin hopi di ofresé tambe na e amante di buseo. CTB ta gradisí tur skol di buseo i partnernan den sektor privá ku a forma parti di e tim di Kòrsou na ‘Duikvaker’.Ku partisipashon na ‘Duikvaker’ a pone atenshon spesial na e beyesa di Kòrsou su mundu marítimo.