Kòrsou presente na ‘Mercado de Turismo Avavit 2014’

WILLEMSTAD- 6 di novèmber 2014 – Resientemente Ofisina di Turismo di Kòrsou (CTB) huntu ku sektor privá a partisipá na e workshop anual ‘Mercado de Turismo Avavit 2014’ ku a tuma lugá na Caracas, Venezuela den e prestigioso Hotel Tamanaco Intercontinental. Avavit, ta organisá dor di Asociación Venezolana de Agencias de Viajes y Turismo (AVAVIT). Durante Avavit, a presentá oportunidatnan turístiko, finansiero i ekonómiko ku Kòrsou tin di ofresé na biaheronan i invershonistanan Venezolano.

Durante di e ekshibishon a konta ku partisipashon di 180 agensia di biahe i 80 agensia relashoná ku negoshi ku e propósito pa introdusí produktonan nobo. Kòrsou a sá di destaká, ofresiendo informashon di diferente aktividat turístiko manera entre otro buseo, windsurf, gòlf i e supmarino. Ademas di esaki a pone énfasis tambe riba e struktura finansiero sólido di Kòrsou, ku ta hasi nos isla e destinashon perfekto ora ta trata di oportunidat pa invershon debí na e fasilidatnan bankario. Tambe CTB a probechá e okashon pa informá di e aeroliñanan Insel Air, Rutaca i Estelar ku ta ofresé buelo pa Kòrsou. Avior tambe a promové un ruta nobo pa Kòrsou.

Ku partisipashon na Avavit 2014 Kòrsou a sa di posishoná su mes un bes mas komo un destinashon faborito den Karibe i a estrechá lasonan ku sigur lo ta di benefisio den futuro. Un danki ta bai na tur partner ku a forma parti di Avavit 2014: Renaissance Curaçao Resort & Casino, Marriott Curaçao Beach Resort & Emerald Casino, Hilton Curaçao, Santa Barbara Beach & Golf Resort, Sunscape Curaçao Resort, Spa & Casino, Sonesta Kura Hulanda Village & Spa, Kura Hulanda Lodge & Beach Club-GHL Hotel, Blue Bay Resort, Rumba Tours i ACOYA Hotel Suites & Villas.