Kòrsou presente na Vakantiebeurs 2016

WILLEMSTAD- 19 di yanüari 2016 – Vakantiebeurs 2016 kual a tuma lugá na Jaarbeurs na Utrecht, Hulanda e aña aki a hala un kantidat di 121.000 bishitante kompará ku 117.000 na aña pasa. E bishitantenan aki a laga nan mes keda inspirá ku ideanan pa nan próksimo vakashon. Hopi ta esnan ku a bishitá e stènt di Kòrsou. Vakantiebeurs 2016 a tuma lugá di 13 pa 17 di yanüari 2016.

Riba e dia dediká na e delaster desaroyonan i oportunidatnan nobo den e mundu di biahe tabata mas drùk ku añanan anterior ku un total di 16.000 bishitante. Mesun dia a tuma lugá un enkuentro ameno pa media i relashonnan di CTB na e stènt di Kòrsou. Sr. Hugo Clarinda (CTB) i sr. Edward Suares (CTB) tambe tabata presente.

E stènt di Kòrsou tabata bon ekipá ku informashon tokante di nos pais. Huntu ku CTB tabata presente e siguiente partnernan for di sektor privá: CHATA, Scuba Lodge, Amalia Boutique Hotel & Vacation Apartments, Dolphin Academy, Lions Dive & Beach Resort, Livingstone Jan Thiel Resort, Santa Barbara Beach & Golf Resort, Avila Beach Hotel, Kontiki Beach Resort, Hilton Curaçao, Sunscape Curaçao, Papagayo Beach Hotel, Acoya Curaçao, Boutique Hotel ’t Klooster i Dolphin Suites. Tambe agensianan di biahe independiente manera Travel Counsellors i Holland International Reisbureau @ Home tabat’ei presente pa asina bende biahe pa Kòrsou ku e bishitantenan di e stènt.

Huntu ku e partnernan den sektor priva a rifa tambe un biahe pa Kòrsou ku estadia na un di e hotèlnan ku tabata presente na Vakantiebeurs. Pa partisipá na e rifa esnan presente mester a hinka nan man den un akuario grandi i rei kuantu e temperatura di e awa tabata. E temperatura di e awa aki tabata kasi igual na esun di e awanan rondó di Kòrsou.

E aña aki tambe Kòrsou a partisipá na e ruta kulinario. Hopi ta esnan ku a para den rei pa asina purba nos dushi Keshi Yená.