Kòrsou sede pa e kongreso anual di ANVR

...Un kongreso ku ta atraé 250 partisipante for di eksterior...
WILLEMSTAD- 08 di yanüari 2016 – Ofisina di Turismo di Kòrsou (CTB) ta kontentu di por anunsiá ku Kòrsou a keda skohé komo sede pa e kongreso anual di ANVR kual lo tuma lugá na luna di novèmber próksimo. Esaki a keda partisipá durante di e bríndis di aña di ANVR (Algemene Nederlandse Vereniging van Reisondernemingen) ku a tuma lugá dia 7 di yanüari último na Kasteel De Hooge Vuursche na Hulanda. E bríndis di aña ta un enkuentro ku ta keda organisá dor di ANVR pa ehekutivonan di e sektor di biahe kaminda ta presentá e espektativanan i retonan pa e aña koriente. Aña pasa e kongreso anual di ANVR a tuma lugá na Abu Dhabi.

E kongreso ta dirigí riba ehekutivonan, empleadonan di agensianan di biahe, operadornan di tour, ofisinanan di turismo, kompanianan di aviashon, aeropuerto, esnan den aria di enseñansa dirigí riba turismo, kompanianan di seguro di biahe i tambe prensa. Sr. Edward Suares (enkargá ku e kantor di Ofisina di Turismo di Kòrsou na Europa) a indiká ku e sektor di biahe a demostrá último añanan ku por sierto hopi biaha tabata tempunan difísil, di por bai ku kambio loke sigur a hasi e sektor unu fuerte. Ta algu hopi inovativo sr. Frank Oostdam (direktor di ANVR) a demostrá, dor di skohe pa aña 2016 atrobe pa un destinashon leu komo sede. Di e manera ei kibrando e siklo di skohe un biaha pa un destinashon leu i despues unu serka.’ E aña aki 2016, ANVR ta selebrando su di 50 aña di eksistensia, e espektativanan pa e konsumidó ta mustra positivo i a skohe pa un destinashon típiko Hulandes esta Kòrsou komo sede pa e kongreso. KLM, ku tin mas di 80 aña bulando pa i for di Kòrsou lo ta esun enkargá pa trese e partisipantenan di e kongreso Kòrsou.

Sifranan di pasado ta mustra ku e kongreso di ANVR ta atraé rònt di 250 partisipante. Esaki sigur lo ta benefisioso pa Kòrsou. E konferensia ta un oportunidat mas pa Kòrsou demostrá kiko e tin di ofresé i sòru pa e partisipantenan keda despues ku eksperensianan inolvidabel di nos pais.