Kòrsou a sobresalí durante ANATO 2017

WILLEMSTAD: 14 di mart 2017 - Resientemente e tim di Kòrsou a partisipá na e di 36 edishon di ‘Vitrina Turística de ANATO’ ku anualmente ta keda organisá na Colombia. E evento aki ta sirbi komo un plataforma pa ‘showcase’ tur loke nos tin di ofresé na mayoristanan i agensianan di biahe ku ta interesá den hasi negoshi ku nos isla. E tim tabatin 3 dia pa interkambiá ku e bishitantenan. Kòrsou su presentashon tabata eksepshonal, e tim konsistiendo di Ofisina di Turismo di Kòrsou (CTB), operadornan di ‘tour’, hotèl i CHATA, a sa di promové e produkto turístiko ku nos tin di ofresé. Tambe a organisá un ‘happy hour’ unda a invitá gruponan di interes pa disfrutá di un kòktel i na mes momentu fortifiká kontaktonan i diskutí ideanan nobo i oportunidatnan pa hasi negoshi. Prensa kolombiano tambe tabata invitá pa kubri e evento.

Durante ANATO e tim di Kòrsou a duna informashon tambe di fechanan i eventonan importante. E tim a hasi uso di e oportunidat pa elaborá riba selebrashon 20 aniversario di nos sentro di siudat Willemstad riba lista di Herensia Mundial di UNESCO i a anunsiá ku den kuadro di e selebrashon aki lo ta organisando diferente evento durante di aña konmemorando e fecha históriko. Ademas di esei a suprayá Playa Kenepa ku resientemente a keda rekonosé komo e di 8 playa di mas bunita na mundu!

Riba último dia di e evento a registrá 34.000 bishitante ku a mustra interes e aña aki den ANATO, esaki ta un oumento di 15% kompará ku aña pasá. Sin duda esaki tabata un oportunidat ekselente pa mustra kiko Kòrsou tin di ofresé i tambe pa sektor privá por a interkambiá ku kompanianan ku ta deseá di hasi negoshi ku Kòrsou. CTB ta yama danki na Scooby Tours, Fiesta Tours Curaçao, Rumba Tours, Business Serenity, Clarion Hotel & Suites Curaçao, Sunscape Curaçao Resort, Spa & Casino, Livingstone Jan Thiel Resort Curaçao, Papagayo Curaçao, Hilton Curaçao, Renaissance Curaçao Resort & Casino, Santa Barbara Beach & Golf Resort Curaçao i CHATA pa forma parti di e tim di Kòrsou durante ‘Vitrina Turística de ANATO’ 2017.