Kòrsou ta agregá buelo direkto for di Montreal

Willemstad- 18 di òktober 2014:- Kuminsando final di òktober lo resumí e buelonan direkto for di Toronto, Canada pa Kòrsou esaki pa e temporada di winter ku ya kaba a kuminsá. Esaki lo nifiká ku lo tin tres eskoho di buelo for di Toronto pa Kòrsou pa e periodo di winter. Otro notisia positivo ta ku entrante 2015 lo tin buelonan direkto durante henter aña for di Toronto pa Kòrsou ku Air Canada. Tambe Air Canada a habri espasio den nan iterinario pa buelonan direkto for di Montreal pa Kòrsou, esaki mesora ta habri un merkado nobo pa nos isla komo destinashon turístiko. Air Canada lo bula riba djaweps for di i pa Montreal i riba djabièrnè for di i pa Toronto. Riba djadumingu tin tantu buelo di Sunwing komo WestJet pa i for di Toronto. Pa duna inisio na e buelonan for di Canada pa Kòrsou a tene algun evento di introdukshon kaminda ku Ofisina di Turismo di Kòrsou (CTB) a keda kompañá pa diferente partner den industria di turismo.


E evento Curaçao Meets Montreal

Durante di 4 dia e tim di Kòrsou tabata anfitrion di diferente evento. E trayekto a kuminsá ku e evento Curaçao Meets Montreal kual a tuma lugá na Hotel Le Crystal. E tim di Kòrsou huntu ku Air Canada Vacations, TravelBrands i WestJet Vacations a kompartí informashonnan balioso ku e aproksimadamente 90 agentenan di biahe ku a bishita e evento. Durante di e evento a repartí bebida netamente di Kòrsou, a invitá e agentenan di biahe na un sena i a rifa algun premio basa riba preguntanan ku a keda hasí.

E di dos dia, a organisá un “Curaçao Day”, kaminda e tim di Kòrsou a duna presentashon na 52 agente di Air Canada Vacations. Simultáneamente representantenan di CTB, Air Canada Vacations i TravelBrands a tene algun sales call den e área metropolitano di Montreal. E dia a finalisá ku un biahe di henter e tim di Kòrsou for di Montreal pa Toronto, pa einan kontinuá ku e Road Show na Ontario.

E dianan ku a sigui a mantené e mesun formato di e “Curaçao Day” pa e presentashonnan ku a tuma lugá na e ofisina di Sunwing Vacations pa despues hasi un biahe pa Oakville. Curaçao Meets Oakville tambe a konta ku sekshonnan informativo pa agentenan di biahe.


Un bista di e evento ku a tuma lugá na Oakville

Pa alkansá prensa a tene un resepshon i almuerso pa diferente medionan di komunikashon importante na Toronto. Na e dos eventonan dediká na prensa a asistí representantenan di diferente medionan tòp, entre nan Toronto Star, Weddings & Honeymoons, AOL Travel Canada, Pax Media, USA Today, Elle Canada, Toronto Sun, Diver Magazine, Movie Entertainment Magazine, Vitamin Daily, AFAR, National Geographic Traveler i Canadian Travel Press.

Pa finalisá e seri di eventonan ku a tuma lugá den kuadro di promoshon di e buelonan direkto a tene un evento na Hyatt Regency na Toronto. Durante di e resepshon a konta ku 65 agente di biahe hopi entusiasmá ku Kòrsou; a klousura e trayekto di promoshon ku un bufèt, ambiente i algun premio pa tur ku a partisipá aktivamente durante di e trayekto. Un danki ta bai na e partnernan ku a hasi e eventonan aki posibel kual ta Marriott Curaçao Beach Resort & Emerald Casino, Funbini- Taber Tours, Hilton Curaçao, Sonesta Kura Hulanda Village & Spa, Kura Hulanda Lodge & Beach Club, Lions Dive & Beach Resort, Ocean Encounters Curaçao, Renaissance Curaçao Resort & Casino, Santa Barbara Beach & Golf Resort Curaçao i Sunscape Curaçao Resort.