Kòrsou ta drenta kolaborashon ku ABC Network pa promoshon riba Times Square New York

WILLEMSTAD – 23 di yüni 2017 - Aktualmente Kòrsou ta figurá riba 2 billboard digital riba Times Square na New York, un área masha popular ku ta keda frekuentá pa aproksimadamente 330.000 hende tur dia. E promoshon di Kòrsou ta keda presentá riba e pantaya grandi di 1,624 pia na “1500 Broadway Spectacular” i riba e “ABC Supersign”. E pantaya gigante di 3,685 pia ta un íkono riba Times Square. Miónes di hende rònt mundu ta familiar ku e pantaya aki, su dimenshon di LED koutivante ta hasié un pantaya ku ta hala hopi atenshon. Ademas e ta konosí dor di promoshon diario durante ABC su popular programa, ‘Good Morning America’.

Tur esaki a bira posibel danki na un kolaborashon úniko entre Ofisina di Turismo di Kòrsou (CTB) i ABC Network. E partnership promoshonal ku e kanal di televishon ta permití míles di hende sera konosí ku Kòrsou riba un plataforma amplio, miéntras tòg ta keda fihá riba e grupo di enfoke.

Ademas di e billboard, tambe tin un kampaña na televishon aktualmente ku ta kore te ku e temporada di zomer na New York, Miami i Chicago durante di programanan ku mayor oudiensia manera, Eyewitness News, Good Morning America, Live with Kelly i tambe algun game shows popular manera Jeopardy, Wheel of Fortune i otronan. Adishonal, Kòrsou lo risibí kobertura riba portalnan digital ABC.com, ABC On Demand Streaming i tambe riba diferente página di e wepsáit di NYC i Chicago.