Kòrsou ta konkluí otro eksitoso roadshow na New York

WILLEMSTAD- 10 di aprel 2015:- For di momentu di introdukshon di e buelo nònstòp ku JetBlue pa Kòrsou, nos destinashon ta eksperensiando un kresementu signifikante for di New York. Pa brinda sosten na e kompania di aviashon i partnernan hotelero Ofisina di Turismo di Kòrsou (CTB) a djòin ku partnernan mayorista den merkado, Travel Impressions, GOGO World Wide Vacations i algun partner den sektor privá pa organisá un ‘New York Roadshow’ ku e meta pa informá e agentenan di biahe i pa mantené Kòrsou komo nan destinashon di promé opshon pa nan klientenan.

Durante 4 dia e tim di Kòrsou a organisávários seminario edukativo, tene kombersashon di benta i organisá eventonan dediká na media di New York. Di e forma aki a kubri gran parti di e áreanan urbano di e siudat grandi New York. Pa por a hasi tur esaki CTB a konta ku kontribushon di vários partner den industria manera, Avila Hotel, Curaçao Marriott Beach Resort & Emerald Casino, Pelican Express, Presto Car Rental, Renaissance Curaçao Resort & Casino, Santa Barbara Beach & Golf Resort iSunscape Curaçao Resort, Spa &Casino. A inisiá e roadshow na Long Island, (NY) na unda a kombiná un presentashon ku un sena di ‘bon biní’ pa aproksimadamente 50 agente di biahe.

Su siguiente dia e tim a bishitá West Orange, New Jersey kaminda representantenan di sektor privá huntu ku Travel Impressions a tene diferente kombersashon di benta ku agentenan di biahe den e área i asina promové buelonan direkto for di aeropuerto di JFK pa Kòrsou. A finalisá e di dos dia ku un feria komersial spesialmente pa e mas di 50 agentenan di biahe ku mas ta ‘bende’ Kòrsou komo destinashon den e respektivo área. Riba e di tres dia e gira di promoshon a kontinuá parti mainta ku kòmbersashonnan di benta den e siudat di Staten Island i Brooklyn esaki den kombinashon ku Travel Impressions i GOGO World Wide Vacations. Na final di e dia a tene un di tres evento ku a konta ku partisipashon di mas di 30 agente di biahe for di e área menshoná. Pa klousurá e di kuater dia a tene e ‘New York Travel Massive’. E evento aki a enfoká riba ‘travel networking’ esaki ku e meta pa atraé profeshonalnan den industria biahero meskos tambe e medionan di komunikashon klave den industria turístiko. A laga e grupo sera konosí ku Kòrsou via vários fuente di informashon interaktivo. Mas ku 130 miembro di NYC Travel Massive a asistí inkluyendo Budget Travel, American Spa, Resident Magazine, Huffington Post, AFAR, American Way i hopi mas.

CTB huntu ku su partnernan den industria por mira bèk riba un gira di promoshon eksitoso ku a keda bishitá pa un gran kantidat di agente di biahe, miembronan di prensa i profeshonalnan turístiko di New York.