Kòrsou ta lansa vershon digital di e ED-card

...Esaki lo sòru pa un proseso mas lihé i efisiente ora di pasa na Imigrashon...
WILLEMSTAD- 7 di desèmber 2015– Dia 7 di desèmber, Ofisina di Turismo di Kòrsou huntu ku Departamentu di Imigrashon a lansa e vershon digital di e Embarkation and Disembarkation card (ED-card). E online ED-card tin dos meta prinsipal esta sòru pa un proseso mas lihé i efisiente ora di pasa na Imigrashon i e informashonnan di e bishitante ta keda prosesá na mes momento.

Tur bishitante for di eksterior mester kompletá un ED-card pa por pasa na Imigrashon i asina drenta nos pais. Na e momentunan aki e biahero ta risibí e ED-card riba buelo rumbo pa Kòrsou. E karchi aki ta kontené entre otro informashon personal manera: nòmber, fecha di nasementu, tambe for di kua pais e persona ta bini, adrès, propósito di su bishita, e motibu pa kua a skohe pa Kòrsou, kon el a hasi su reservashon, durashon di estadia i e akomodashon ku a keda skohí. Entrante awor ku introdukshon di e vershon Online di e ED-card e biahero por yena e karchi sinta den komodidat di su kas promé ku e subi buelo rumbo pa Kòrsou. Ku introdushon di e Online ED-card e kantidat di tempu ku e bishitante mester para den rei di Imigrashon lo keda redusí konsiderablemente. E Online ED-card lo ta sinkronisá ku e asina yama Border Management System ku ta e sistema ku Departamentu di Imigrashon ta usa.

Kon pa haña akseso na e Online ED-card
E biahero mester subi wèpsait di CTB, www.curacao.com klik riba e tab ‘Online ED-card’ pa asina por haña akseso na e formulario digital.

Proseso pa yena e ED-card
Despues di buk un buelo pa Kòrsou e biahero por subi seguidamente e wèpsait di CTB i kompletá e formulario digital. E formulario mester keda kompletá 24 ora promé ku sali pa Kòrsou. Mesora despues di kompletá e formulario e persona ta risibí un email bèk ku ta konfirmá e registrashon Online. Importante ta pa indiká ku e email di konfirmashon ku e persona risibí despues di yena e formulario digital no ta nifiká ku e persona ta garantisá di su entrada na Kòrsou. Un funshonario di Imigrashon ta esun ku lo duna e aprobashon final ora ku e persona yega Kòrsou i pasa na e bali di Imigrashon.

Proseso na bali di imigrashon
Na yegada, e bishitante mester presentá su pasport bálido na e funshonario di Imigrashon pa esaki match e pasport ku e informashon ku ta aparesé den e sistema.

E ED-card aktual lo keda disponibel si pa biaheronan ku ta preferá di yena e formulario durante di nan buelo pa Kòrsou.