Kòrsou ta risibí kobertura riba The Huffington Post i Yahoo!

WILLEMSTAD- 7 di ougùstùs 2015– Resientemente The Huffington Post ku su base na Broadway, New York a brinda kobertura na Kòrsou den su sekshon di biahe. E artíkulo figurá den ‘Travel’ di e korant digital a suprayá e buelonan direkto ku JetBlue for di New York pa Kòrsou. Ademas di esaki a duna atenshon na nos sentro di siudat Willemstad i atrakshonnan akuátiko pa e turista na Kòrsou. Den e artíkulo ‘6 Small But Perfect Caribbean Islands You Need to See’ a duna tres rason dikon e turista ta preferá Kòrsou.

E sekshon ‘Reasons We Love Curaçao’ a enfoká riba Willemstad, e isla su refnan i e hotèlnan. Nos sentro di siudat rekonosé dor di UNESCO ku ta ofresé un bista kolonial fasinante, oportunidat di bishitá museo i variashon kulinario ofresé dor di diferente restorant na Kòrsou. E refnan di Kòrsou, a keda altamente rekomendá na tur amante di buseo. E artíkulo ta sigui splika ku e bista bou di laman na Kòrsou ta impreshonante. Finalmente den e sekshon di ‘Travel’ a hasi menshon di opshonnan di estadia manera Marriott Curaçao Beach Resort & Emerald Casino i Hilton Curaçao i tambe a menshoná ku Kòrsou ta ofresé un variedat di akomodashon pa tur presupuesto.

Ademas di figurá den The Huffington Post, e artíkulo a figura tambe riba e portal di Yahoo!. Yahoo! tin un alkanse di 109,892,550 bishitante mensual dunando e artíkulo un balor impagabel. Pa mira e artíkulo por bishita e link http://huff.to/1eXHZO8.