Kòrsou ta risibí plakat di rekonosementu di parti di e empresa Kolombiano Latín Press

WILLEMSTAD- 7 di mei 2015ResientementeOfisina di Turismo di Kòrsou (CTB) den un seremonia ku a tuma lugá na Colombia durante e di 10 edishon di e kongreso ViajesCorp. Américas a keda honra pa e empresa Latín Press mediante un plakat di rekonosementu. Kòrsou tabata presente na e kongreso pa por hasi kontakto ku e asina yama meeting planners kual ta e personanan responsabel pa organisá eventonan di insentivo òf kongreso pa nan empresa. Kòrsou su partisipashon na e tipo di eventonan aki ta krea oportunidat pa haña gruponan grandi ku ta bin Kòrsou pa tene nan eventonan akinan lokual ta generá aktividat ekonómiko pa nos pais.

E rekonosementu aki Kòrsou a risibí komo muestra di gradisimentu pa e kontribushon ku Kòrsou a duna na e kongreso ViajesCorp. Américas durante e 10 añanan tras di lomba. Kòrsou su dedikashon i esfuerso tabata fundamental pa kresementu di e kongreso. Sr. Hugo Clarinda, direktor interino di CTB i sr. Victor Dapena, representante di CTB na Colombia a risibí e plakat na nòmber di CTB. E plakat a keda presentá pa sr. Fabio Enrique Giraldo representante di Latín Press ku ta e organisadó di e kongreso.