Kòrsou ta skor atrobe ku e premio pa e stènt di mas imaginativo na NY Times Travel Show

WILLEMSTAD- 15 di yanüari 2016 – Ofisina di Turismo di Kòrsou (CTB) a laga míles di e personanan di New York ku tabata presente na e New York Times Travel Show keda fasiná ku e 360 grado eksperensia virtual di nos brùg Emma. E New York Times Travel Show a tuma lugá di 8 pa 10 di yanüari último na Jacob K. Javits Center na New York City.

New York Times Travel Show ta e evento di biahe mas grandi di komersio i konsumidó na Nort Amérika ku ta konta ku partisipashon di 500 stènt for di mas di 150 pais. Banda di deskuentonan i ofertanan spesial, e show ta ofresé seminarionan edukativo i entretenamentu bibu pa famianan, personanan individual, parehanan i esnan di mas edat. Kòrsou su partisipashon na e show tabata e oportunidat perfekto pa ta dilanti di mas di 6000 profeshonal den aria di komersio, mas di 600 profeshonal di media i mas di 15.000 konsumidó for di e aria di tri-state.

E aña aki CTB su tim na Merka a laga traha komo stènt un réplika di nos famoso Koningin Emmabrug (brùg di ponton) mihó konosí komo the “Swinging Old Lady”. Tambe e presentenan por a pasa den un eksperensia virtual real kaminda nan ta sinti manera ta riba nos brùg di ponton nan ta kanando i haña un bista di 360 grado di nos sentro di siudat Willemstad. Kòrsou a skor haltu dor di ta inovativo den brinda un eksperensia manera esaki ku ta duna un sentido real di kon lo bo sinti bo di ta na Kòrsou. New York Times Travel Show a otorgá Kòrsou e premio di e stènt mas imaginativo. E premio aki ta rekonosé ekselensia i inovashon den stènt i presentashonnan.

CTB a keda kompañá pa diferente partner den sektor privá, inkluyendo Floris Suite Hotel Spa & Beach Club, Livingstone Jan Thiel Resort i Papagayo Curaçao. E partnernan privá aki no solamente a duna nan aporte pa yuda fortifiká e nòmber di Kòrsou durante e eksibishon pero tambe a duna nan aporte na e parti di promoshon di e buelo nònstòp di JetBlue dor di brinda ofertanan spesial i oportunidat pa gana biahe pa Kòrsou. Durante di e 3 dianan di e evento e stènt di Kòrsou a repartí mas di 5000 foyeto informativo i a risibí mas di 450,000 impreshon riba medionan sosial di bishitantenan ku a hasi uso di e hashtag #ExperienceCuracao riba diferente plataforma di medionan sosial manera Twitter, Instagram i Facebook.

Tambe CTB a hasi uso di e oportunidat pa presentá durante di e New York Times Travel Industry Conference un programa edukativo spesialmente dirigí riba profeshonalnan di biahe. Mas di 100 agente di biahe di e aria di New York a partisipá na e programa aki. CTB ta sigui ku su esfuersonan pa kada biaha di nobo keda bini ku maneranan inovativo pa promové nos pais.