Kòrsou a trese ambiente na ‘Caribbean Week New York’

...Nos Blue Curaçao Liqueur i sabor krioyo a pèrkurá pa otro eksitoso presentashon...
WILLEMSTAD - 24 di yüni 2015 – Ofisina di Turismo di Kòrsou (CTB) huntu ku Ministerio di Desaroyo Ekonómiko liderá pa Minister Stanley Palm resientemente a topa ku hefenan di estado karibense, ministernan, ehekutivonan den industria di biahe i ehekutivonan ku ta enfoká riba turismo den region na ‘Caribbean Week New York’. Un siman ku diferente aktividat karibense na ‘The big Apple’.

‘Caribbean Week New York’ tur aña di nobo ta atraé míles di partisipante i ta risibí kobertura di prensa internashonal. Loke ta hasi ‘Caribbean Week New York’ úniko den su estilo ta e kombinashon perfekto di seshonnan komersial, eventonan i oportunidat di ‘netwerk’. E propósito di e siman karibense ta pa krea konsientisashon riba e variedat di produktonan ku ta keda ofresé i ekshibí e oportunidatnan empresarial den nos region.

E aña aki a klousurá ‘Caribbean Week New York’ ku un evento yamá ‘Rum and Rhythm’ pa rekoudá fondo pa studiantenan den nos region. Durante di e evento invitadonan tabatin oportunidat di purba algun kòktel trahá ku e outéntiko Blue Curaçao Liqueur i tambe saboriá kosnan di boka dushi manera kokada, tentalaria i ko’i lechi. Pa sigurá ku e ambiente tabata total a sòru pa músika karibense zona durante di e evento. E anochi memorabel aki tabata e ‘highlight’ di e kalènder sosial di ‘Caribbean Week New York’ ku a konta ku presensia di mas ku 600 invitado entre nan komediante Majah Hype i algun ‘Celebrity Chefs’.