Limpiesa di playanan públiko na parti Wèst a start

Willemstad – 12 di òktober 2016 – Ofisina di Turismo di Kòrsou (CTB) konhuntamente ku Ministerio di Salubridat Públiko, Medio Ambiente i Naturalesa den wikènt tras di lomba a start ku e proseso pa drecha e playanan públiko den aria di Banda Abou ku a sufri daño despues di pasashi di orkan Matthew i tambe e bientu sùit wèst ku Kòrsou a hañ’é konfrontá kuné na komienso di siman pasá.

Un kontratista a kuminsá ku e trabou di limpiesa na e diferente playanan. E playanan ku ta forma parti di e proyekto di mantenshon aki ta: Playa Kalki, Playa Grandi (Playa Piskadó), Playa Fòrti,Playa Abou (Playa Kenepa Grandi), Playa Kenepa Chikí,Playa Jeremi,Playa Lagun,Playa Sta. Cruz,Playa Daaibooi,Playa Boca Sami iPlaya Wachi. Relashoná ku e trabounan di limpiesa ku ta ehersiendo na e playanan, ta bon pa públiko tene kuenta ku tin algun playa ku lo ta kompletamente aksesibel bèk dia 13 di òktober despues di mèrdia pa atardi. Ta trata aki di Playa Piskadó i Playa Daaibooi miéntras Playa Lagun, Playa Sta. Cruz i Playa Boca Sami ta parsialmente aksesibel i pa mèrdia/atardi lo ta kompletamente aksesibel. Playa Kenepa Grandi i Chikí lo ta aksesibel pa públiko entrante djabièrnè 14 di òktober parti mainta. A start mesora ku e proseso pa analisá e gastunan di reparashon di e mobilario ku tin ubiká na e diferente playanan manera palapa i bankinan.