Logeergastenbelasting ta bira OB entrante 1 di yanüari 2016

WILLEMSTAD- 21 di desèmber 2015 – Resientemente Gobièrnu di Kòrsou a anunsiá ku entrante promé di yanüari 2016 Logeergastenbelasting lo keda inkluí den e Landsverordening Omzetbelasting 1999. Esaki ta nifiká ku lo no bai tin Logeergastenbelasting (LGB) mas pero ku na su lugá ta introdusí Omzetbelasting (OB). E porsentahe ta keda igual esta 7%.

E OB ku ta keda introdusí na lugá di LGB ta e loke ku mester keda kobrá pa estadia di durashon korto den hotèl, apartamentu priva i partikulir i tambe timeshare. Entrante yanüari 2016 Departamentu di Inspekshon di Impuesto lo ta esun enkargá ku ‘heffing’ di e OB aki i no Ofisina di Turismo di Kòrsou (CTB) mas manera tabata e kaso ku LGB. E fecha di pago ta keda meskos esta ku tur pago mester keda hasí promé ku dia 15 di kada luna. E parti di kobransa ta keda den man di Landsontvanger. Kartanan di opheshon tambe for di luna di yanüari 2016 mester keda entregá na Departamentu di Inspekshon di Impuesto. Naheffingsaanslagen di aña 2015 si ta keda atendé pa CTB.

Departamentu di Inspekshon di Impuesto lo manda e aangiftebiljetten pa aña 2016. Huntu ku e aangiftebiljetten lo bai tambe un splikashon kòrtiku over di e kambio. Tur instansia ku tabata paga LGB, den e simannan benidero lo risibí un karta di Departamentu di Inspekshon di Impuesto ku un splikashon di e kambio di LGB pa OB.

Manera a keda anunsiá anteriormente den prensa, pa ehekushon di e Master Plan di Turismo 2015 – 2020 CTB tin mester di e fondonan nesesario kual pa gran parti lo mester bini for di e montante ku ta keda generá for di pago di OB. Pa e motibu aki CTB ta hasi un yamada na tur ku ta bini na remarke pa paga OB dor ku nan ta hür kualkier tipo di akomodashon ku turista, pa kumpli ku esaki. E montante generá ta keda usá pa ehekutá diferente kampaña di promoshon i publisitario den eksterior ku e meta pa por trese mas turista pa nos pais. Pues mas entrada for di OB ta nifiká mas promoshon pa Kòrsou kual lo trese mas turista i mas turista ta nifiká mas entrada pa nos ekonomia lokal.

Pa mas informashon por pasa personal na lokèt number 9 na Departamentu di Inspekshon di Impuesto òf bishita wèpsait di e departamentu na www.belastingdienst.cw.