Mart 2015 a registrá un oumento di 11%

...un impakto direkto di 217.3 mion florin den e promé kuartal di 2015...
WILLEMSTAD- 21 di aprel 2015 – Sifranan kolekta pa Ofisina di Turismo di Kòrsou (CTB) ta indiká ku pa luna di mart a registrá 3.986 turista di estadia más kompará ku mart aña pasa, kontinuando di e manera aki ku e desaroyo positivo ku kual a kuminsá aña. Un total di 39.676 turista a keda registrá na mart 2015 kual ta un kresementu di 11%. E kresementu aki ta partikularmente debí na entre otro prestashon eksepshonal di algun merkado importante. Na mart 2014 e kantidat di turista tabata 35.690.

E buelo nobo for di New York ku JetBlue ta reflehá bèk den e sifranan positivo di Estado Unídos. Nort Amérika a registrá un oumento di 14% ku un total di 8.716. Estádos Unídos a krese ku 9% ku un total di 6.009 bishitante. Canada a registrá un kresementu di 28% ku un total di 2.707 turista di estadia den luna di mart 2015. E kresementu aki por keda atribuí direktamente na e buelonan semanal for di Toronto ku West Jet, Air Canada i Sunwing. Ademas ampliashon di e skema di buelo di Air Canada entrante 1 di yanüari último ku buelonan direkto for di Montreal pa Kòrsou tambe tabata instrumental den kresementu di e merkado di Canada. Banda di esei e esfuersonan di merkadeo huntu ku partnernan den industria di turismo a trese mehorashon den e prestashon di e merkado di Nort Amérika.

Region di Sur Amérika a krese ku 49% na mart 2015. A registrá un total di 10.776 turista kompará ku 7.225 na 2014. For di Venezuela un oumento di 65% a keda registrá. Un total di 7.412 turista Venezolano a bishita nos pais den luna di mart. Na mart 2014 un total di 4.489 turista di estadia a keda registrá. Colombia i Sürnam tambe a registrá kresementu den kantidat di turista di estadia. Respektivamente 79% i 2% más turista. Brazil si a konosé un kaida di 13%.

For di region di Europa nos a registrá un oumento di 5% na mart 2015. Europa a registrá un total di 16.938 turista durante luna di mart kompará ku 16.159 na mart 2014. For di Hulanda, e pais for di kua nos ta registrá mas tantu turista nos a risibí 11.910 turista kual ta un kaida di 2%. Alemania a registrá un oumento di 53% mas turista na luna di mart 2015. Un total di 2.831 turista a bishita nos pais for di Alemania. Aña pasa na e mesun luna un total di 1.850 aleman a bishita nos pais.

Sifranan promé kuartal di 2015
Pa loke ta trata e promé kuartal di 2015 por mira un prestashon positivo di 13% kompará ku e mesun periodo aña pasa. Un total di 14.279 turista adishonal a bishita nos pais registrando kresementu den e 3 regionnan primario pa Kòrsou kualnan ta Nort Amérika, Sur Amérika i Europa. Registrando un kresementu di respektivamente 21%, 41% i 3%. E kantidat total di turista pa loke ta trata e promé kuartal di aña pa e 3 regionnan primario ta lo siguiente: Nort Amérika ku un total di 24.697 turista, Sur Amérika ku 35.348 i for di Europa nos a risibí un total di 51.895 turista.

E kantidat di anochi ku e bishitantenan a keda nos pais den e promé kuartal di 2015 ta mustra un kresementu di 8%. Sifranan preliminar ta mustra un total di 1.088.512 anochi. Aña pasa un kantidat di 1.007.707 anochi a keda registrá. For di e karchinan di embarkashon i desembarkashon por konstatá ku 69.4% di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (31.1%), esnan di ménos ku 150 kamber (14.0%), bùngalo (15.6%), apartamentu (7.7%) i guesthouse (0.9%). E kantidat di turista ku a keda na un akomodashon no registrá ta representá 30.6% di e kantidat di turista ku a bishita nos durante e promé kuartal di aña. Akomodashonnan no registrá ta akomodashonnan ku no ta aparesé den CTB su sistema di dato.

Hasiendo uso di e modelo ‘Turistika’ Ofisina di Turismo di Kòrsou (CTB) huntu ku MEO a kalkulá ku durante e promé kuartal di 2015, sektor di turismo a generá un impakto direkto di 217.3 mion florin pa nos ekonomia lokal. Promé kuartal di 2014 e montante tabata 187.46 mion. Region di Europa a generá un total di 97.7 mion florin kual ta 44.9% di e totalidat. Su tras ta sigui region di Sur Amérika ku 56.2 mion, Nort Amérika ku 48.8 mion i e entrada generá for di region Karibe a keda kalkulá na 8.7 mion florin.

Download file .