Mart 2016 a krese ku 13%

WILLEMSTAD- 9 di mei 2016 – Sifranan preliminar kolektá pa Ofisina di Turismo di Kòrsou (CTB) ta indiká ku pa luna di mart 2016 a registrá un kresementu di 13% kompará ku mart 2015. Esaki ta un total di 5.210 turista adishonal. Te ku aworakí luna di mart ta e luna ku a nota mihó prestashon kaminda tur region a registrá sifranan positivo. Un total di 44.736 turista di estadia a keda registrá kompará ku 39.526 turista na mesun luna aña pasa.

E region di Nort Amérika a registrá un kresementu di 6% na luna di mart. Un total di 9.184 turista a keda registrá kompará ku 8.695 na mart 2015. Estado Unídos a registrá un total di 6.462 turista kual ta un kresementu di 8%. Canada a registrá un kresementu leve di 1% ku 2.722 turista di estadia na luna di mart 2016. E esfuersonan kontinuo di merkadeo na Estado Unídos i Canada ta mustrando nos e resultadonan positivo aki den e merkado di Nort Amérika.

Region di Sur Amérika a krese ku 15% ku un total di 12.349 turista di estadia kompará ku 10.721 na 2015. E kantidat di turista for di Venezuela a konosé un subida bèk na luna di mart 2016. For di Venezuela un kresementu di 16% a keda registrá ku un total di 8.536 turista di estadia kompará ku 7.354 na aña pasa mart. Sí mester remarka ku solamente 23% di e turistanan for di Venezuela a keda na un akomodashon registrá miéntras ku aña pasa e kantidat aki tabata 42%. Colombia i Sürnam tambe a registrá kresementu di respektivamente 15% i 49%. Den sifranan apsoluto ta trata di 1.216 i 1.051 turista di estadia. Brazil a konosé un bahada di respektivamente 24%.

Merkado di Europa a registrá un kresementu di 13% na mart 2016. Esaki ta un total di 19.103 turista di estadia kompará ku 16.912 na mart 2015. Hulanda, e pais for di kua nos ta risibí mas tantu turista a nota un kresementu di 5% ku un total di 12.453 turista na mart 2016 kompará ku 11.883 na 2015. Alemania a registrá 15% mas turista na luna di mart. Un total di 3.261 turista a keda registrá. Aña pasa mesun luna a registrá 2.830 turista aleman. For di Bèlgika a nota un kresementu di 154% ku un total di 1.224 turista di estadia na mart 2016. E kresementu aki ta komo konsekuensia ku vakashon den kuadro di Pasku di Resurekshon a skùif kompará ku aña pasa.

Turismo di estadia for di region Karibe na luna di mart a krese ku 30% mas turista. Aruba a krese ku 60% kual ta representá un total di 1.487 arubiano. Mayoria turista for di Aruba a bishitá Kòrsou durante e dianan di Siman Santu. Trinidad i Tobago tambe a registrá un bon prestashon ku 18% mas turista.

E kantidat di anochi ku e turista a keda riba nos pais a konosé un bahada leve di 2%. E úniko region ku a registrá kresementu den kantidat di anochi ta Europa. For di e region aki un kresementu di 2% a keda nota. Region di Nort Amérika, Sur Amérika i Karibe a registrá respektivamente 4%, 6% i 10% ménos kantidat di anochi kompará ku na mart 2015. Un punto notabel pa loke ta trata luna di mart ta ku nos a konosé mas tantu turista pero esakinan a keda ménos kantidat di anochi. E kantidat averahe di anochi ku e turistanan a keda den luna di mart ta 7.4 anochi miéntras aña pasa esaki tabata 8.6 anochi.

Download sifranan