Mas di 175 hóben di Scouting Antiano i AGPNA a partisipá na konferensia di turismo

...Hóbennan a demostrá di ta konsiente di e importansia di turismo...
WILLEMSTAD- 26 di yüni 2016 - Resientemente Ofisina di Turismo di Kòrsou (CTB) a duna inisio na e proyekto Dushi Hende t’ Ami; Mi ta ON! E kampaña di konsientisashon ta dirigí spesialmente riba hóbennan entre 12 i 19 aña i tin komo meta pa alsa e nivel di konsiensia bou di nos hóbennan riba e balor di turismo, stimulá mas edukashon relashoná ku tópikonan di turismo i stimulá hóbennan pa skohe despues pa un trabou den sektor di turismo. Enkonekshon ku esaki tin diferente proyekto pa hóben, un di nan ta e konferensia ‘Mi ta ON ku Turismo!’ ku a tuma lugá djasabra último na WTC ku un bon asistensia.E grupo di enfoke di e konferensia tabata hóbennan di Scouting Antiano i AGPNA entre 12 i 15 aña.Na inisio di e konferensia, Minister di Desaroyo Ekonómiko, sr. Eugene Rhuggenaath a elaborá riba tópikonan di turismo i a duna algun palabra di motivashon na e hóbennan.

Komo preparashon pa e konferensia e hóbennan di Scouting Antiano i AGPNA a asistí na seshonnan di informashon durante un periodo di 4 siman pa asina nan ta bon ekipá. Durante di e konferensia a trata 5 tópiko: 1) Kiko ta turismo?, 2) Turismo i Ekonomia, 3) Trabou den turismo, 4) Den sapatu di e turista i 5) Seguridat den sektor di turismo.

E hóbennan a ekspresá nan pensamentu den forma di un presentashon; e propósito di esaki tabata pa laga hóbennan di Scouting Antiano i AGPNAmustra for di nan punto di bista kiko desaroyo di turismo ta nifiká pa Kòrsou. Esnan presente tambe tabatin oportunidat di hasi pregunta durante di e konferensia. CTB ta felisitá e hóbennan ku un eksitoso konferensia. E kampaña di konsientisashon aki ta finansiá pa Reda Sosial, ku fondo di Gobièrnu di Kòrsou. CTB tambe ta kontribuí finansieramente den e proyekto aki i huntu ku Fundashon Nos Kousa ta enkargá ku ehekushon di e proyekto.