Mayoristanan for di Merka i Canada presente na Kòrsou pa otro konferensha interesante di NATOS

WILLEMSTAD- 3 desèmber 2014 – Durante dianan 3 i 4 di desèmber ta tumando lugá e konferensha anual ‘North American Tour Operator Symposium’ (NATOS). E konferensha aki ta konta ku partisipashon eksklusivo di mayoristanan den e industria turístiko for di Merka i Canada. Ofisina di Turismo di Kòrsou (CTB), Curaçao Hospitality and Tourism Association (CHATA) i partnernan den sektor privá i públiko a uni un bes mas pa realisashon di e konferensha aki ku ta duna un kontribushon signifikante na desaroyo i kresementu di nos industria turístiko. Durante di e apertura a hiba palabra Minister di Desaroyo Ekonómiko, sr. Stanley Palm, sra. Lizanne Dindial (CHATA) i sr. Hugo Clarinda (CTB).

Den su spich Minister Palm a duna di konosé ku aña pasá, partisipantenan na NATOS 2013 a ekspresá ku si ta deseá di mira un kresementu for di merkado nortost i Estádos Unídos en general, lo mester pèrkurá pa mas ‘airlift’. Minister Palm a sigui bisa ku sektor públiko i priva a traha huntu riba e punto aki i ku awor por hasi menshon di e buelo nònstòp di JetBlue entre Kòrsou i New York ku a kuminsá bula ayera, Air Canada ku ta bulando Kòrsou kaba for di Toronto i ku ta pendiente pa su buelo inougural for di Montreal entrante 1 di yanüari 2015, WestJet ku a oumentá kapasidat di su avionnan, Sunwing ku ya ta biniendo Kòrsou pa su di dos aña, American Airlines ku durante di añanan previo a demostrá su lealtat na Kòrsou brindando dos buelo pa dia i nos kompania lokal Insel Air ku ta ofresiendo mas buelo i ta sigui krese. Despues di e parti ofisial a sigui un presentashon di e orador di honor, dr. Patricia Russell - McCloud. Dr. Russell ta un orador rekonosé internashonalmente pa su manera impreshonante pa enkurashá su públiko. Dr. Russell a para ketu riba e importansia pa sigui perseverá no opstante e situashon ku bo ta aden. Sigui pusha bai dilanti paso bo futuro a kuminsá ayera! E partisipantenan i demas invitado a keda sumamente impreshoná di e mensahe ku dr. Russel a kompartí ku sigur a sa di motivá tur presente.

Parti mèrdia e partisipantenan a bishita diferente sitio pa asina konosé e produkto ku Kòrsou ta ofresé. Mas aleu den e programa e partisipantenan lo tin e oportunidat pa partisipá na seshonnan one-on-one kaminda e partisipantenan ta haña e oportunidat pa interkambiá i deliberá riba faktornan klave ku ta influensiá kresementu di e industria turístiko. NATOS 2014 ta konta ku partisipashon di Air Canada Vacations, American Airlines- Miami, Bookit.com, Booking.com, Orbitz World Wide, Expedia, Cheap Caribbean, Caradonna Dive Adventures, TravelBrands Inc, Maduro Dive Fanta-Seas, Sunwing Vacations, Pleasant Holidays, Travel Impressions, Flight Centre USA / Libgo Travel, Viva Tours, US Airways Vacations, Ocean Encounters Diving USA, JetBlue Getaways, Insel Air, Hotelbeds.com i Top Vacations.

Un danki ta bai na tur e partnernan ku a yuda den realisashon di NATOS 2014 kualnan ta: Curaçao Marriott Beach Resort & Emerald Casino, Renaissance Curaçao Resort & Casino, Business Serenity, Hilton Curaçao, D&I Business Support Services, Funbini Taber Tours, Santa Barbara Beach and Golf Resort Curaçao, Pelican Express i Sunscape Curaçao Resort.NATOS 2014 ta un esfuerso mas di CTB i su partnernan pa mantené i establesé relashonnan internashonal duradero ku impakto direkto riba merkado turístiko.