Merkado di Nort Amérika a konosé un kresementu di 21% den luna di yüli 2015

...Apesar di e merkado instabil di Venezuela, luna di yüli a keda stabil...
WILLEMSTAD- 26 ougùstùs 2015 – Sifranan preliminar kolektá pa Ofisina di Turismo di Kòrsou (CTB) ta indiká ku pa luna di yüli a registrá mesun kantidat di turista ku aña pasa. Un kantidat di 36.871 turista a bishita Kòrsou den yüli e aña aki kompará ku 36.849 na 2014. E kaida den e kantidat di bishitantenan for di Suramérika (Venezuela)a ser kompensá pa e merkadonan di Europa, Nòrt Amérika i Karibe ku a konosé un kresementu fuerte di 11.68% i 20.54% i 9.11% respektivamente.

For di e Europa nos a risibí 17.026 turista di estadia kompará ku 15.245 na yüli 2014. For di Hulanda, e pais for di kua nos ta risibí mas tantu turista a risibí 13.990 turista kual ta un oumento di 15%. E region di Nort Amérika den yüli a registrá un kresementu di 20.54% ku un total di 5.535 turista kompará ku 4.592 na yüli 2014. For di Merka nos a risibí 4.749 turista ku ta un kresementu di 9%. Un biaha mas ta registrá hopi bishitante for di New York, e tráfiko aki ta resultado positivo di buelonan direkto ku JetBlue for di e siudat pa Kòrsou. Canada ta sigui registrá oumentu, e luna aki ku 256%,un total di 786 turista di estadia. Aña pasá yüli solamente 221 turista a keda registrá. E oumentu aki ta resultado di e buelonan di Air Canada rouge durante henter aña for di Toronto.

E merkado di Sur Amérika ta registrá un kaida di 21.24% na yüli 2015 ku un total di 8.923 turista di estadia kompará ku 11.329 na 2014. For di e promé kuartal di aña, e region aki no a krese mas den estadia. E restrikshon introdusí dor di gobièrnu venezolano ta sigui afektá e merkado; a registrá un kaida di 34% for di Venezuela. Un total di 5.256 turista a drenta for di Venezuela na luna di yüli 2015 kompará ku 7.907 aña pasá. CTB a premirá e kaida aki i a prepará pa esaki oumentando merkadeo den regionnan ku potensial di kresementu. E echo ku nos por a mantené e kantidat di turista stabil pa luna di yüli ta muestra di esfuersonan diversifiká den merkadeo ku a resultá eksitoso. Tráfiko for di Colombia a registrá kresementu di 71% den yüli, un total di 1.400 bishitante. CTB ta enfokando esfuersonan di merkadeo pa por tin un mihó resultado for di Colombia. Ku eliminashon di visa pa Colombia for di dia promé di yüli último ta pronostiká kresementu pa e di dos mitar di aña.

Sifranan promé 7 luna di aña 2015
Pa loke ta e promé 7 lunanan di aña turismo di estadia a krese ku 7% di 246.849 pa 264.505. Un total di 17.656 turista adishonal a bishitá Kòrsou registrando kresementu den tur e regionnan primario. Nort Amérika, Sur Amérika i Europa a registrá kresementu di respektivamente 25%, 7% i 6%. For di region di Nort Amérika nos a registrá un total di 49.953 turista, Sur Amérika a registrá 70.363 turista i for di Europa un total di 114.119 turista. For di Karibe nos a risibí un kantidat di 19.347 turista.

E kantidat di anochi ku e bishitantenan a keda nos pais den promé 7 lunanan di aña di 2015 ta mustra un kresementu di 2%. Sifranan preliminar ta mustra un total di 2.277.074 anochi. For di e karchinan di embarkashon i desembarkashon ta konstatá ku 68.4% (180.942) di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (31.2%), esnan di ménos ku 150 kamber (13%), bùngalo (16.5%), apartamentu (6.8%) i guesthouse (1.0%). E kantidat di turista ku a keda na un akomodashon no registrá ta representá 31.6%.

Hasiendo uso di e modelo ‘Turistika’, CTB huntu ku MEO a kalkulá ku durante e promé 7 lunanan di aña 2015, sektor di turismo a generá un impakto direkto di 462.3 mion florin pa nos ekonomia lokal. E promé 7 lunanan di 2014 e montante tabata 418.6 mion florin. Region di Europa a generá un total di 214.4 mion florin kual ta 46.4% di e totalidat. Su tras ta sigui region di Sur Amérika ku 110.8 mion florin, Nort Amérika ku 98.6 mion florin i entrada generá for di Karibe a keda kalkulá na 24.9 mion florin na 2015.

Download sifranan