Minister Rhuggenaath a topa ku prensa na Miami

WILLEMSTAD- 28 di aprel 2016 - Resientemente Ofisina di Turismo di Kòrsou (CTB) konhuntamente ku Minister Rhuggenaath a tene un enkuentro ku prensa na Miami. Durante di e evento aki por a konta ku presensia di diferente medionan di komunikashon ku ta keda usá durante di aña pa esfuersonan publisitario. Meta di e enkuentro ku prensa tabata pa laga Minister Rhuggenaath sera konosí ku e prensanan mas importante di Miami i tambe krea oportunidat di kobertura pa Kòrsou na un manera dinámiko i kreativo.

Kada oportunidat ku topa ku prensa internashonal ta importante; di un manera informal talaga e grupo sera konosí ku Kòrsou via vários fuente di informashon interaktivo. Durante di e enkuentro ku prensa aki tambe a usa e ‘Curaçao VR’ ofresiendo e miembro di prensa un eksperensia virtual real di Kòrsou. Na kada evento ta invitá un grupo di enfoke. Pa e okashon aki a invitá representante di e siguiente medionan di komunikashon: revista Recommend (sirkulashon 49,759 i 159,936 bishitante úniko pa luna), Cara Mia (sirkulashon 200,000), El Venezolano (sirkulashon 20,000 i 250,148 bishitante úniko pa luna), Boston Globe (sirkulashon 868,200 i 15,669,035 bishitante úniko pa luna), Robb Report (sirkulashon 101,022 i 138,267 bishitante úniko pa luna), ShowBoats International (sirkulashon 41,017), LUHHO Magazine (50,000), Miami Living Magazine (32,000) i Worthy Magazine (31,188 bishitante úniko pa luna).

Durante di e enkuentro a laga prensa yena un kuestionario interaktivo ku ta kontené informashon di e atrakshonnan turístiko di mas nobo na Kòrsou; for di esaki a surgi tópikonan interesante pa prensa elaborá riba dje. Tambe a traha un lista di informashon di Kòrsou ku despues miembro di kada medio por usa den nan publikashonnan. Miéntras nan tabata disfrutá di un kòktel trahá ku ‘Blue Curaçao’ kada miembro di prensa a risibí material di promoshon di Kòrsou, inkluyendo brel di solo i un USB ku potrèt di Kòrsou i otro informashonnan relevante. Por mira bèk riba un evento eksitoso ku sigur lo duna su frutanan. Kada artíkulo ku keda publiká di Kòrsou ta lanta kuriosidat serka e turista pa hasi nos un bishita.