NEC ta selebrá título na Kòrsou

...Klup di futbòl di Nijmegen ta karga bateria den solo kurasoleño...

WILLEMSTAD- 15 di mei 2015 –Pa selebrá e kampeonato di Jupiler League, e selekshon kompleto di NEC Nijmegen tei na Kòrsou pa un siman i lo keda te ku dia 19 di mei próksimo.

Dia 3 di aprel último, e ekipo a sa di salbaguardiá e título despues di un viktoria di 1- 0 na kas riba Sparta Rotterdam. Ku e triunfo aki, e futbolistanan prosedente di e siudat di Nijmegen a sa di bini bèk den un solo temporada riba e nivel di mas haltu di futbòl profeshonal i lo bai enfrentá klupnan manera Ajax, Feyenoord i PSV den e próksimo temporada. Mientrastantu e selekshon i staf lo gosa di un siman bon meresí aki na Kòrsou. Un bosero di NEC a indiká ku Kòrsou sigur ta un isla pa revitalisá den un dushi solo.