New York a sera konosí ku Kòrsou su trùk di batido

WILLEMSTAD- 30 di ougùstùs 2016 – Resientemente Ofisina di Turismo di Kòrsou (CTB), Curaçao Airport Partners (CAP) i representantenan di hotèlnan miembro di Curaçao Hospitality and Tourism Association (CHATA) a kompletá otro eksitoso roadshow na New York. Komo parti di e evento a presentá un trùk di batido na e distrito di Flatiron i Union Square ku ta dos di e arianan mas trafiká na New York.

Ku e meta pa atraé konsumidónan na New York e organisashonnan a plania pa bini ku algu ku sigur ta hala atenshon. E evento tabata diseñá pa krea mas konsientisashon di nos pais i duna oportunidat na e personanan di New York pa konosé mas di loke Kòrsou tin di ofresé, interakta ku e diferente partnernan i tambe tabatin oportunidat pa gana un biahe pa Kòrsou i purba un di Kòrsou su famoso batidonan.

Riba un di e dianan a parker e trùk patras di e edifisio ikono di Flatiron i su siguiente dia e trùk tabata parker riba Union Square. Riba e trùk tabatin skibi “Right Now in Curaçao” (Aworakí na Kòrsou), kual ta forma parti di e kampaña nobo di merkadeo i aviso di CTB. E trùk kolorido a hala hopi atenshon di tur ku tabata trafiká den e aria menshoná. Miéntras parti di e tim di Kòrsou tabata repartí batido grátis, tabata duna informashon general di Kòrsou, di e buelonan non-stop di JetBlue pa Kòrsou i tambe repartí atributonan di promoshon. A rifa tambe via di un kòntèst online riba medionan sosial diferente premio di biahe pa dos persona pa bishita Kòrsou.

Komo resultado e evento a krea hopi interakshon riba medionan sosial mirando ku tabata enkurashá e personanan pa usa e hashtag #RightNowInCuracao i tambe e filter di Kòrsou riba Snapchat.

Durante di e dos dianan di e evento mas di 3000 persona di New York a hasi uso di e oportunidat pa saboriá un batido i via di medionan sosial a alkansá un kantidat di 600,000 persona. Danki na e evento aki Kòrsou aworakí ta riba kaminda pa bira un destinashon ku sigur personanan di New York lo konsulta ora di hasi nan eskoho pa nan siguiente vakashon.