Nort Amérika a registrá kresementu di 8%

WILLEMSTAD- 4 di mart 2016 – Ofisina di Turismo di Kòrsou (CTB) ta raportá ku turismo di estadia for di Nort Amérika a registrá un kresementu di 8% ku un total di 8.585 turista kompará ku 7.936 na yanüari 2015. Un kresementu di 2% a keda registrá for di Estádos Unídos kual ta representá 5.155 turista. Miéntras ku Canada a registrá un kresementu di 20%.

E prestashon di e merkado Merikano e aña aki ta relativamente stabil kompará ku aña pasa. Klaramente por mira e importansia di mas aeroliña ku ta bula pa Kòrsou for di Estádos Unídos pa asina oumentá e kantidat di turista di estadia. Canada a registrá un kresementu di 20% ku 3.430 turista di estadia na luna di yanüari 2016. E kresementu aki nos por atribuí na e buelonan semanal for di Toronto ku Air Transat. E atkisishon di Air Transat kombiná ku esfuersonan di merkadeo di sektor públiko i privá a sòru pa un mehorashon notabel den e prestashon for di Canada.

Merkado di Europa a registrá un kresementu di 4% na yanüari 2016. E region aki a sòru pa un total di 18.795 turista di estadia kompará ku 18.068 na yanüari 2015. Hulanda, e pais for di kua nos ta risibí mas tantu turista a konosé un kresementu leve di 1% ku 14.139 turista di estadia. For di Alemania un total di 1.594 turista a keda registrá kual ta un oumento di 3% kompará ku aña pasa. Aña pasa e kantidat tabata 1.555.

Region di Sur Amérika a registrá un bahada di 26% na yanüari ku ta nifiká un total di 9.793 turista di estadia kompra ku 13.227 na 2015. Venezuela a konosé un bahada di 30% ku un total di 6.283 turista di estadia. Ta konosí ku inflashon na Brazil ta haltu despues ku e Gobièrnu a imponé diferente subida di impuesto ku e meta pa balansa e presupuesto total miéntras e moneda di Brazil esta Real ta pone ku preisnan pa importashon ta subiendo. Na 2015 e moneda di Brazil a kai ku aproksimadamente 47% kompará ku e dòler merikano. E krísis ekonómiko ta reflehá den e kantidat di turista di estadia for di Brazil. Den luna di yanüari, 40% ménos turista a bishita nos pais kual den sifranan apsoluto ta 1.053 turista di estadia. E moneda di Colombia kual ta Peso tambe ta keda influensha pa e dòler merikano fuerte. Afortunadamente e kampaña di Curaçao Sin Visa ta stimulando kresementu for di e pais aki. Colombia a krese ku 8% den yanüari ku 1.208 turista.

Turismo di estadia for di region Karibe a baha ku 9% den yanüari 2016. Un total di 2.234 turista a keda registrá. Aruba a registrá un bahada di 20% ku un total di 1.070 turista di estadia.

Sifranan preliminar kolektá pa CTB ta indiká ku pa luna di yanüari a registrá un bahada leve di 2% ku un total di 41.696 turista di estadia. Esaki ta un total di 734 turista ménos kompará ku yanüari 2015 kaminda un kantidat di 42.430 turista di estadia a bishitá Kòrsou.

Indikadónan pa yanüari 2016
E kantidat di anochi ku e bishitantenan a keda nos pais e promé luna di 2016 ta mustra un bahada di 13%. Sifranan preliminar ta mustra un total di 351.978 anochi. Aña pasa yanüari e kantidat tabata 403.723. E region di Nort Amérika ta e úniko ku a registrá kresementu. Un total di 64.007 anochi a keda registrá kual ta un kresementu leve di 2%. For di Sur Amérika a registrá un bahada di 43%. E kantidat di anochi ku e turista for di Europa a keda nos pais a konosé un bahada leve di 2% kual ta 215.132 den sifranan apsoluto.

For di e karchinan di embarkashon i desembarkashon por konstatá ku 64% (26.568 turista) di e kantidat total di turista di estadia a keda na un akomodashon registrá. E repartishon ta lo siguiente: hotèl di mas ku 150 kamber (27%), bùngalo (18%), hotèl ku ménos ku 150 kamber (12%) i apartamentu (7%). E kantidat di turista ku a keda na un akomodashon no registrá ta representá 36% di e kantidat di turista ku a bishitá nos durante e promé luna di aña. Esaki ta un total di 15.128 turista. Akomodashonnan no registrá ta akomodashonnan ku no ta aparesé den CTB su sistema di dato.

Mayoria di e turistanan di estadia, esta 37% di e total, ku a keda risibí durante yanüari 2016 ta entre 25 i 44 aña di edat. E grupo aki ta keda sigui pa esnan entre 45 i 64 aña di edat kual ta un total di 15.209 turista. E otro gruponan ta esnan entre 0 i 14 aña, 15 i 24 aña di edat i esnan 65 plùs. Nan a registrá respektivamente 2.545, 2.871 i 5.475 turista.

Hasiendo uso di e modelo ‘Turistika’, CTB huntu ku MEO a kalkulá ku durante e promé luna di 2016, sektor di turismo a generá un impakto direkto di 75 mion florin pa nos ekonomia lokal. Na yanüari 2015 e montante tabata 73 mion florin. Region di Europa a generá un total di 37 mion florin kual ta 48.9% di e totalidat. Su tras ta sigui region di Nort Amérika ku 17 mion, Sur Amérika ku 15 mion, i e entrada generá for di region Karibe a keda kalkulá na 3 mion florin.