Ofisina di Turismo di Kòrsou (CTB) ta selebrá 25 aña di servisio

Willemstad- 30 di sèptèmber 2014: Riba dia 1 di òktober, Ofisina di Turismo di Kòrsou (CTB) ta selebrá su di 25 aniversario. Ku satisfakshon CTB por mira bèk riba añanan di trabou duru na benefisio di nos turismo. Awendia un kantidat di aproksimadamente 12.000 persona ta laborá den e sektor di turismo. Turismo ta kontribuí anualmente ku kasi un kuart di nos ekonomia. Na aña 1989, tempu ku a funda Curaçao Tourism Development Foundation, Kòrsou tabata risibí 193,032 turista di estadia. Durante añanan e kantidat aki a sigui subi i nos a finalisá aña 2013 ku 440,714 turista di estadia.

Na 1915 a funda Curaçao Association ku tabata enkargá ku promoshon di Kòrsou. Despues di algun aña a pasa e responsabilidat aki pa Kámara di Komersio i Industria. For di 1945 te 1948 a apuntá un representante na New York ku tabata raportá na Kámara di Komersio i Industria riba desaroyonan turístiko di Kòrsou den eksterior. Na momentu ku Gobièrnu di Kòrsou a tuma e tarea di promoshon turístiko for di Kámara di Komersio i Industria a lanta Curaçao Tourism Commission (CTC). Na aña 1955 Curaçao Tourist Board (CTB) a remplasá CTC. CTB a habri un ofisina na Caracas, Venezuela na 1982 i na Rotterdam, Hulanda na aña 1984. Na 1989 a funda Curaçao Tourism Development Foundation (CTDF). Na 2003 CTDF a kuminsá usa e nòmber Curaçao Tourist Board (CTB). Awendia banda di e ofisina na Kòrsou, CTB tin tambe ofisina na Nort Amérika i Hulanda i representante na Venezuela, Colombia, Alemania i Brazil.

CTB su tarea primordial ta pa oumentá presensia di Kòrsou den tur merkado importante ku e meta pa atraé mas bishitante pa nos pais. Ku presentashonnan na ferianan di turismo i diferente road show, CTB a logra semper mustra e mihó kara di nos pais. Ademas durante añanan a logra ku éksito pa atraé un kantidat di programa di televishon internashonal ku a bin filma nan episodionan na Kòrsou i a duna miónes di hende un introdukshon di kon bunita nos pais ta. Ku programa kontinuo di kurso i entrenamentu CTB ta duna su aporte den profeshonalisá personanan ku ta laborá den turismo pa asina garantisá ku nos bishitantenan ta risibí un bon servisio. E kampaña Dushi Hende ta un di e ehèmpelnan di instrumèntnan ku CTB a introdusí pa konsientisá nos hendenan riba e importansia di nos komportashon pa ku nos mes i pa ku e turista.

Hopi importante den e 25 añanan tras di lomba ta e aporte ku CTB ta risibí di tur partner den turismo pa asina logra e meta komun ku ta promové nos isla den eksterior. Kòrsou por sigui konta ku CTB su esfuerso pa huntu ku tur partner sigui desaroyá nos turismo i hib’é na un próksimo nivel. 25 aña...ta motibu sufisiente pa nos selebrá! Kòrsou danki! CTB; e palanka di turismo, brindando un kuart siglo di servisio.