Operashon Siman Santu 2015: promé pa 6 di aprel

WILLEMSTAD- 26 di mart 2015:- Pa di 5 aña konsekutivo Ofisina di Turismo di Kòrsou (CTB) a uniforsaku diferente entidat públiko i priva pa ehekutá un biaha mas Operashon Siman Santu. Durante di un rueda di prensa, Ofisina di Turismo di Kòrsou huntu ku su partnernan a anunsiá e trabounan ku e tim enkargá ku Operashon Siman Santu lo bai ehekutá. Meta di Operashon Siman Santu ta pa garantisá seguridat i trankilidat pa tantu e turista ku ta di bishita na Kòrsou durante e periodo di Siman Santu komo nos hendenan lokal. Operashon Siman Santu ta tuma lugá e aña aki di promé di aprel pa 6 di aprel 2015. E lema ta keda:“Bin ku bo saku, bai ku bo shushi”. Kòrdando tur hende riba nos kada un su responsabilidat pa yuda tene nos isla limpi.

CTB a informá ku basa riba eksperensia di añanan anterior por spera un fluho grandi di bishitantenan for di eksterior ku ta bishitá nos den e periodo di Siman Santu. Pa e motibu aki CTB a tuma e inisiativa pa lanta un tim multi- disiplinario ku ta konsistí di entidatnan gubernamental i diferente parternan den sektor di turismo pa asina garantisá seguridat i trankilidat durante e periodo menshoná. Den kuadro di Operashon Siman Santu 11 playa públiko a keda apuntá na unda lo bai optimalisá servisionan di limpiesa, servisionan di tualèt portátil i seguridat. E playanan aki ta: Caracasbaai aria di rekreashon i mirador, Boca Simon, Pier di Mari Pampoen, Daaibooi, Sta. Cruz, Lagun, Jeremi, Kenepa Grandi, Kenepa Chikí, Playa Fòrti i Playa Kalki. Lo bai tin tambe spòtnan di konsientisashon na radio. Ademas e aña aki hóbennan di Bos di Hubentut lo bai ta repartiendo bou di turistanan foyetonan informativo ku ta kontené tepnan di seguridat ku e turista mester tene kuenta kuné.

Operashon Siman Santu ta un esfuerso di CTB huntu ku Kuerpo Polisial Kòrsou, Ministerio di Salubridat Medio Ambiente i Naturalesa, MNB (ántes LVV), THZ (ántes Hygiënische Dienst), Fundashon Kuido di Ambulans, Marechaussee, Warda Kosta, Selikor, Citro, Brantwer, Rode Kruis, Maritime Authority of Curaçao (MAC) i kuerponan di seguridat den e arianan turístiko i playanan públiko. E entidatnan menshoná a ser repartí den dos sekshon; e sekshon ku ta atendé ku órden públiko i e sekshon ku ta atendé ku infrastruktura, limpiesa i komunikashon.

Warda Kosta a informá ku durante Siman Santu lo tene kòntròl riba botonan pa chek si tur dokumentonan i rekisitonan di seguridat ta abordo i na òrdu: entre otro vèst, flair i aparato pa paga kandela. Lo tin kòntròlnan riba komportashon di botonan i tambe sea-doo sigur kaminda hende ta landa. Den kaso di emergensia por yama 913. Ademas Warda Kosta konhuntamente ku CITRO lo atendé kasonan di reskate riba laman. Puntonan importante: tene kuenta ku kantidat di pasahero ku ta permití den boto, mester tin aparatonan pa komuniká abordo; Radio VHF/ telefon selular, ku bateria kargá i tambe flairnan pa por indiká bo posishon den kaso di búskeda.

Ministerio di Salubridat a para ketu na aspektonan ku tin di haber ku; salú, kuminda i higiena, seguridat, medio ambiente i naturalesa. A pone énfasis riba e.o. higiena i seguridat di kuminda i/o bebida pa konsumo personalòf pa benta na públiko. Ta hasi un petishon na personanan ku ta bai grill pa ora di bai kas bai ku e karbonnan i no laga esakinan riba playa. Fundashon Kuido di Ambulans lo bai ta tantu parti pariba komo pabou i lo bai pone unidatnan èkstra durante di Siman Santu.

Pa loke ta trata e parti di limpiesa Selikor a anunsiá ku lo amplia e skema di rekohé shushi na e diferente playanan ku ta forma parti di Operashon Siman Santu. Lo sòru tambe pa pone mas kònteiner pa e periodo aki. Na e playanan kaminda tin tualèt portátil e personal di Selikor lo sòru pa limpia i desinfektá esakinan ku regularidat. Ta hasi un petishon na esnan ku ta kedando na un wikènthùis durante di Siman Santu pa no bai benta nan sakunan di shushi den e kònteinernan ku tin ubiká na e playanan mirando ku e dianan ei lo tin hopi usuario na playanan. Konsekuentemente e kònteinernan lo no bai ta sufisiente. Konforme e skema normal Selikor lo pasa rekohé e shushinan di wikènthùis riba djaluna i spesialmente pa e temporada di Siman Santu a pone un dia èkstra kual lo ta riba e djasabra. Si ainda esaki no ta sufisiente por pasa depositá shushi na Landfill Malpais. Number di pikèt pa Selikor lo ta: 566-1635.

Kuerpo Polisial a anunsiá ku durante di Siman Santu lo bai tin polis patruyando na e diferente arianan turístiko i playanan públiko tantu parti pariba komo pabou. Agentenan di POLITUR tambe lo forma parti di Operashon Siman Santu. Brantwer tambe lo ta disponibel pa den kaso ku esaki ta nesesario. Tambe a anunsiá ku lo bai tin kòntròl di tráfiko na diferente sitio. Durante di e aktividat ku ta tuma lugá na Playa Fòrti riba dia 5 di aprel, mester tene kuenta ku kambio di tráfiko entre 2or di mèrdia pa 8or di anochi. Pa esnan ku ta bini for di Wacawa lo desviá e tráfiko for di Santana di Westpunt. Pa esnan ku ta bini for di direkshon di Kenepa lo desviá e tráfiko promé ku Playa Fòrti na altura di Restaurant Rancho El Sobrino. Tene kuenta ku si bo parker di forma iresponsabel lo laga kita e vehíkulo riba bo propio gastu. Pa kasonan no urgente por yama 917 i den kaso di urgensia por yama e number 911.

E entidatnan enbolbí den Operashon Siman Santu a hasi un apelashon riba komunidat pa duna di nan parti pa asina Kòrsou por konosé un Siman Santu trankil tantu pa nos mes komo pa nos bishitantenan for di eksterior.