Pareha Stone a hasi 50 aña bishitando Kòrsou

...Minister Rhuggenaath a entregá e pareha un rekonosementu...
WILLEMSTAD- 22 di aprel 2016 - Pareha Stone ta bishitando Kòrsou for di aña 1966 kumpliendo e aña aki 50 aña bishitando nos dushi pais Kòrsou. Esaki sigur ta motibu pa Ofisina di Turismo di Kòrsou (CTB) duna rekonosementu na e pareha aki. Pa e okashon spesial aki Minister di Desaroyo Ekonómiko sr. Eugene Rhuggenaath a risibí e famia i a sostené un kombersashon ku nan.

Pareha Stone ta biba na Merka i a konta ku na aña 1966 nan a bishita Kòrsou pa promé biaha riba invitashon di un amigu. Nan ta bishitando Kòrsou por lo ménos un biaha pa aña. Pa nan Kòrsou ta un paraiso, e mihó den e islanan ABC i e lugá di mas bunita na mundu. E loke mas pareha Stone ta gusta hasi ora nan ta na Kòrsou ta práktika nan hòbi faborito kual ta buseo. Nan tin 800 ‘duik’ hasí aki na Kòrsou.

Sra. Stone a konta ku tur ku kier drenta nan famia mester pasa e tèst di Kòrsou. Bo mester ta stima Kòrsou manera nan. Esaki mes ta e motibu ku tantu nan yunan komo nan kasá ta bishitando nos pais regularmente. Por bisa ku 4 generashon di pareha Stone ya kaba konosé Kòrsou. E nietunan ta gusta Kòrsou mashá. Durante e añanan tras di lomba e pareha a introdusí diferente hende na Kòrsou i tur a bishitá nos pais pa mas ku 1 biaha kaba. Nan ta lamentá di no a siña papia papiamentu, pero ainda tin tempu pa esaki. Nan ta gusta partikularmente nos hendenan amabel ku semper ta habrí pa den e idioma di e turista trata na yuda esaki. Minister Rhuggenaath a keda enkantá ku e pareha i nan yunan ku tambe tabata presente. Minister Rhuggenaath a ekspresá su gratitut na e famia pa nan amor inmenso pa Kòrsou i a bisa kon importante e interakshon ku nos hendenan lokal ta i ku esaki ta e turismo ku nos kier promové komo pais. Nos kier kompartí Kòrsou ku nos bishitantenan. Despues di e kombersashon ameno ku famia Stone, Minister Rhuggenaath a hasi entrega di un plakat di rekonosementu i regalo na e pareha i a invitá e famia pa sigui bishitá nos dushi pais Kòrsou.