Periodistanan for di Alemania enkantá ku Kòrsou

WILLEMSTAD- 26 di yüni 2015– Resientemente Ofisina di Turismo di Kòrsou (CTB) a risibí un grupo di prensa for di Alemania. A diseñá un iterinario spesífikamente pa nan por eksplorá Kòrsou; e programa a brinda posibilidatnan úniko i diferente pa ekshibí tur loke Kòrsou tin pa ofresé.

E grupo ku a hospedá na Floris Suite Hotel & Spa i Renaissance Curaçao Resort & Casino a konsistí di 4 editor di kolumna di biahe. Ta trata aki di Stefanie Kasparek di Rheinische Post, Christiane Pötsch-Ritter di Schwäbische Zeitung, Jens Peter Burmeister di Hannoversche Allgemeine Zeitung i Madeleine Bierlein di Mannheimer Morgen. Tur ta korantnan regional na Alemania ku ta kubri entre otro temanan manera polítika, ekonomia, deporte, kultura i biahe. Rheinische Post ta un korant ku tin un publikashon diario di 345.623 i ta konsentrá den e área di Düsseldorf ku ta un área ku tin un nivel di entrada mensual haltu. Miéntras ku Schwäbische Zeitung tin un publikashon diario di 175.051 i 47.3% di su lesadónan suskribí tin un entrada familiar di €2.500 òf mas. Hannoversche Allgemeine Zeitung ta un korant ku ta konsentrá den Hannover i áreanan den Lower Saxony i tin un publikashon diario di 530.295. Estadístika ta mustra ku 61.7% di lesadónan di e korant aki tin un entrada mensual riba €3.000. Mannheimer Morgen tin un sirkulashon diario di 121.236. E grupo mas grandi di su lesadónan tin riba 30 aña.

Manera semper CTB a hinka un iterinario atraktivo den otro konsistiendo di 8 dia yená ku aktividatnan turístiko ku a inkluí entre otro bishita na Dinah Veeris, Plantashon di Aloe Vera, bishita na Museo Internashonal Kura Hulanda, un ‘tour’ kulinario, un jeep ‘safari tour’ na Christoffelpark i un bishita na Landhuis Chobolobo. Ademas di esaki, a brinda e invitadonan un eksperensia kulinario variá bishitando vários restorant rònt Kòrsou entre nan Hemingway, Cabana Beach, restorant New York, Osteria Rosso, Oporto Restaurant, Marshe Bieuw, Green House Mambo Blvd., i Mundo Bizarro. CTB ta gradisí tur partner pa nan kontribushon na realisashon di e programa.