Prensa for di Ecuador a realisá filmashon na Kòrsou

WILLEMSTAD- 3 di yüni 2015–Ofisina di Turismo di Kòrsou (CTB) resientemente a diseñá un programa spesífikamente pa un grupo di periodista for di Ecuador. Durante di nan estadia e grupo a bishitá diferente parti di Kòrsou pa konosé mas di loke nos pais tin pa ofresé komo destinashon turístiko i alabes realisá algun filmashon ku lo pasa próksimamente na kanal Ecuavisa na Ecuador.

E grupo a konsistí di 7 persona di 4 medio di prensa. Di Revista Matinal En Contacto tabat’ei presente sr. Henry Rodolfo Bustamante Muñoz i sr. Walter Oswaldo Arellano Mideros. Tambe a forma parti di e grupo sr. Carlos Julio Gurumendi Escott i sr. Ramon Matías Vergara Moreira di Noticiero Telemundo. Tantu e programa Revista Matinal En Contacto komo Noticiero Telemundo ta pasa na kanal di televishon Ecuavisa. Ta trata aki di un kanal di televishon rekonosé internashonalmente pa su produkshonnan di telenovela, notisia i programanan di entretenimiento. Di Diario El Universo tabat’ei presente sr. Alex Leonardo Carrillo Jaramillo i sr. Daniel Isaías Garcia Arreaga. Mas Travel tambe a forma parti di e grupo por medio di su representante sr. Geovanny Enrique Carrera Bonilla.

CTB a hinka un iterinario atraktivo den otro konsistiendo di 4 dia yená ku aktividat ku a inkluí entre otro paseo den sentro di suidat, bishita na Museo Kura Hulanda, grabashon na Sunscape Curaçao Resort, Spa & Casino i tambe na Santa Barbara Beach & Golf Resort Curaçao. CTB ta gradisí tur partner den sektor turístiko pa nan kontribushon na realisashon di e programa.