Prensa internashonal a kuminsá yega pa e di 7 edishon di Curaçao North Sea Jazz Festival

WILLEMSTAD- 1 di sèptèmber 2016 – Curaçao North Sea Jazz Festival (CNSJF) a posishoná su mes un biaha mas komo e evento musikal di mas grandi den region di Karibe. Manera añanan anterior Ofisina di Turismo di Kòrsou (CTB) a yuda promové e festival den su merkadonan prinsipal. CTB den estrecho kolaborashon ku Fundashon Bon Intenshon ta trahando huntu na e promoshon promé, durante i despues di e evento.

E aña aki CTB a invitá un total di 17 periodista ku a bin di; Brasil, Sürnam, Aruba, Colombia, Estádos Unídos, Venezuela i St. Maarten pa kubri CNSJF 2016. Representantenan di e siguiente medionan di komunikashon lo tei presente e aña aki: Televen, Noticias24, Los Originales – La FM de RCN, Salsa con Estilo – W Radio Colombia, Panrotas, Veja Magazine, Rolling Stone Magazine, Power Fm Radio, Noticia Cla, ATV Suriname Television, Radio 10, Surinaamse Televisie Stichting (STVS), Victuals, Philipsburg Broadcasting Corp, Radio Oasis 96.3 FM i WEAA FM 88.9FM - Baltimore.

Ademas di kubri e festival, e prensa invitá ta haña oportunidat di konosé algun di e atrakshonnan ku nos isla tin di ofresé. Un danki ta bai na tur partner den sektor di turismo pa nan kolaborashon. Pabien na Fundashon Bon Intenshon ku un otro edishon di CNSJF.