Programa di televishon ‘Xploration Awesome Planet’ a realisá grabashon na Kòrsou

WILLEMSTAD- 29 di mei 2015: E programa di televishon edukativo internashonal ‘Xploration Awesome Planet’ ku ta konsentrá riba geologia resientemente a realisá un grabashon na Kòrsou. Durante di 5 dia e tim di ‘Xploration Awesome Planet’ a forma parti di un programa spesial prepará dor di Ofisina di Turismo di Kòrsou (CTB) i partnernan den industria turístiko.

Entre e lugánan ku e grupo di ‘Xploration Awesome Planet’ a bishitá tabatin Seaquarium Beach kaminda ku nan a hasi un ‘submarine dive’ ku e CuraSub, paseo den Pietermaai, a eksplorá Shete Boka i diferente playa i tambe a bishita vários restorant lokal kaminda a disfrutá di platonan krioyo. E grabashonnan realisá durante e bishita na Kòrsou lo keda transmití durante 4 diferente episodio den e di dos temporada. Algun di e segmentonan ku lo figurá den e programa lo ta tokante entre otro: kon pa protehá bida marítimo for di lionfish, eksplorashon di oséano ku Substation Curaçao i un ekskurshon interesante den kuebanan di Hato. Pa por a kompletá e grabashonnan bou di awa e tim a hasi uso di kompania lokal Turtle & Ray productions. E episodionan nobo lo keda transmití den luna di sèptèmber 2015 i lo pasa 2 pa 3 bes pa aña durante e próksimo 3 añanan. ‘Xploration Awesome Planet’ ta wòrdu produsí dor di Steve Rotfeld Productions ubiká na Philadelphia, Pennsylvania (USA). Esaki ta e mesun kompania ku ta produsí e programa di biahe aventurero ‘Awesome Adventures’ ku a realisá un grabashon na Kòrsou den 2013.

Tokante ‘Xploration Awesome Planet’
‘Xploration Awesome Planet’ ta un programa edukashonal ku ta pasa na kanal di televishon merikano FOX Networks. E promé temporada a konta ku un promedio di 400.000 televidente pa kada episodio. E grupo di enfoke’ ta hóbennan entre 13 i 19 aña di edat. Presentadó di e programa ta Philippe Cousteau ku a establesé su mes komo un lider prominente den movementu ambiental. Philippe Cousteau ta nietu di Jacques Cousteau ku ta konosí entre otro pa su investigashonnan tokante bida marítimo.

CTB ta kontentu ku e bishita di ‘Xploration Awesome Planet’ i ta gradisí tur partner ku a kontribuí na realisashon di e programa.