Programa filmá na Kòrsou riba proseso di destilashon di awa a pasa na kanal di Brazil

WILLEMSTAD- 29 di aprel 2015– Algun luna pasa un periodista di e popular kanal di televishon na Brazil, Globo TV tabata na Kòrsou pa traha un reportahe riba e proseso di destilashon di awa aki na Kòrsou. Ta konosí ku São Paulo, e siudat mas grandi diBrazil ta eksperensiando aktualmente un skarsedat di awa mirando ku e lagonan for di kua ta saka awa pa destilá ta sekando dor ku awa ta kayendo ménos. Esaki ta pone ku riba sierto dianan tin restrikshon di uso di awa pa e habitantenan.

E periodista di Globo TV sr. Ernesto Pagliahuntu ku su tim a bishita Kòrsou pa asina por sa mas di e proseso di destilashon di awa for di laman ku ta tuma lugá aki na Kòrsou. E reportahe a konsistí di un rekorido riba e instalashonnan di Aqualectra, entrevistanan i kombersashon ku un Brazilero ku ta biba aki na Kòrsou ku ta konta su eksperensia ku e awa ku ta keda destilá aki na Kòrsou. Globo TV tin un sintonia hopi grandi na Brazil pa kual motibu ta algu hopi positivo ku e brazileronan por tende di Kòrsou atraves di un programa edukativo. Mesora despues ku e programa a kaba di pasa na Globo TV por a mira un oumentu di 207.5% na bishitante for di Brazil riba CTB su wèpsait kompará ku e dia promé. Pa por wak e reportahe bai riba e link: http://glo.bo/1Eh2IXj