Promoshon pa bishitá Kòrsou riba 75 bùs na Toronto, Canada

WILLEMSTAD- 28 di aprel 2016 – Komo parti di e kampaña di promoshon ku Ofisina di Turismo di Kòrsou (CTB) ta kondusiendo huntu ku Air Canada Vacations a lansa un promoshon riba bùsnan ku ta kore den aria di Toronto, Canada. Riba un total di 75 bus ku ta kore den e aria di Toronto por mira un steker grandi ku promoshon pa bishitá Kòrsou.

Meta di e kampaña aki ta pa promoshoná e buelo direkto di Air Canada for di Toronto pa Kòrsou. E kampaña a keda lansá na prinsipio di luna di aprel i tin un durashon di 4 siman. E kampaña ta duna oportunidat pa kumpra tíket pa Kòrsou pa 2 persona promé ku dia 30 di aprel i risibí un deskuento di 300 dòler. Durante di e próksimo periodo te ku luna di sèptèmber lo bai tin diferente akshon promoshonal mas manera entre otro: banner di promoshon riba wèpsait di Air Canada Vacations, promoshon riba pantayanan digital den left, promoshon riba taksi, aviso den korant, na radio i riba medionan sosial.