Promoshon pa Kòrsou riba kamisa di e tim di Reino Hulandes na World Baseball Classic

WILLEMSTAD- 8 di mart 2017 – Ofisina di Turismo di Kòrsou (CTB) ta super orguyoso ku e prestashon di e tim di Reino Hulandes ku ta partisipando aktualmente na World Baseball Classic mirando e gran kantidat di “Yu di Kòrsou” den e tim aki i tambe di e echo ku e tim tin e logo ‘Curaçao’ riba manga di nan kamisa. Esaki sigur ta un promoshon grandi pa nos pais ya ku ta hopi ta e personanan ku ta sigui e kampeonato di World Baseball Classic via di televishon i via di medionan sosial. CTB a sera un akuerdo komersial ku Major League Baseball pa por pone e logo ‘Curaçao’ riba e manga di kamisa di e hungadónan.

Ademas ta bon pa menshoná ku diferente artíkulo a keda publiká den prensa internashonal relashoná ku e partisipashon di e tim na World Baseball Classic i spesialmente poniendo atenshon riba e hungadónan lokal i tambe dunando informashon general di Kòrsou. Por a tuma nota di un artíkulo ekstenso ku a sali riba The New York Times komo un ehèmpel. CTB ta deseá e tim di Reino Hulandes ku ta konsistí di diferente hungadó yu’i Kòrsou bou di guia di Hensley Meulens hopi éksito ku e sobra weganan. Boso ta hasi nos orguyoso!