Rekonosementu otorgá na famia Jeurgens pa mas di 20 bishita pa Kòrsou

WILLEMSTAD- 4 di mei 2015: Famia Jeurgens ta bishitando Kòrsou tur aña for di 1995 i den sierto kaso mas ku un biaha pa aña. Pues por konkluí ku e famia konsistiendo di mama, tata i 2 yu di respektivamente 10 i 11 aña tin mas ku 20 aña biniendo Kòrsou pa vakashon. For di nan nasementu e yunan ta biniendo Kòrsou tur aña ku nan mayornan. Esaki sigur ta motibu pa Ofisina di Turismo di Kòrsou (CTB) duna rekonosementu na e famia aki. Pa e okashon spesial aki Minister di Desaroyo Ekonómiko sr. Stanley Palm a risibí e famia i a sostené un kombersashon ku nan.

E famia a konta ku durante e añanan ku nan ta biniendo Kòrsou nan a mira kon Kòrsou a bai dilanti kompará ku 20 aña pasa. Nan a menshoná entre otro e variedat di hotèlnan i nos infrastruktura. Durante e mas di 20 bishita pa nos pais nan a keda na diferente tipo di hotèl tantu pariba komo parti pabou. Semper e famia ta hür outo pa asina kore eksplorá rònt Kòrsou. Pa nan Kòrsou ta nan di dos kas. Famia Jeurgens gusta partikularmente e trankilidat ku tin na Westpunt. E loke mas e yunan gusta ta pa bai landa i tambe snòrkel na Janthiel i na Daaibooi. E biaha aki e famia a bini pa 2 siman. Minister Palm di su banda a elaborá riba e desaroyonan positivo ku turismo di Kòrsou ta pasando aden i a duna un bista di e vishon pa ku turismo pa e próksimo añanan. Despues di e kombersashon ameno ku famia Jeurgens, Minister Palm a hasi entrega di un plakat di rekonosementu i regalo na e famia i a invitá e famia pa sigui bishitá nos dushi pais Kòrsou.