Rekonosementu otorgá na pareha Bruins pa 25 aña bishitando Kòrsou

WILLEMSTAD- 29 di aprel 2016 - Pareha Bruins a hasi 25 aña bishitando Kòrsou. Esaki sigur ta motibu pa Ofisina di Turismo di Kòrsou (CTB) duna rekonosementu na e pareha aki. Pa e okashon spesial aki Minister di Desaroyo Ekonómiko sr. Eugene Rhuggenaath a risibí e pareha i a sostené un kombersashon ku nan.

Pareha Bruins ta biba na Hulanda i tin 25 aña bishitando nos pais. E pareha a konta ku na okashon di nan di 40 aniversario di matrimonio nan a opta pa un fakansi na Kòrsou huntu ku nan yunan i nietunan enbes di organisá un fiesta. For di e tempu ei nan ta enamorá di Kòrsou. E promé biaha ku nan a bishitá Kòrsou nan a hospedá na Plaza Hotel i despues di esei nan a hospedá na diferente parti di Kòrsou. Aworakí ya pa algun aña kaba e pareha tin nan propio apartamentu aki na Kòrsou. E pareha ta pasa 6 luna di aña na Kòrsou i e otro mitar di aña na Bèlgika. Nan tei for di aña pasá novèmber i e luna aki lo regresá bèk. Pareha Bruins ta enkantá ku e músika di sr. Michael Anthony un músiko lokal. Nan tin bon kontakto kuné i ta konsider’é un amigu. E pareha a sigui konta ku nan a sera hopi amistat durante e añanan ku nan ta bishitando Kòrsou. Nan yunan i nietunan tambe ta enkantá ku Kòrsou. Nan a bisa ku den nan kaso nan tin dos kas referiendo aki na Kòrsou komo nan di dos kas. E yu hòmber di e pareha ku tambe tabata presente, a bisa ku e vírus di Kòrsou a kontagiá nan tambe motibu pa kual nan ta bishitando Kòrsou ku regularidat.

Minister Rhuggenaath di su banda a elaborá riba e desaroyonan positivo ku turismo di Kòrsou ta pasando aden i a duna un bista di e vishon pa ku turismo pa e próksimo añanan. Despues di e kombersashon ameno ku famia Bruins, Minister Rhuggenaath a hasi entrega di un plakat di rekonosementu i regalo na e pareha i a invitá nan pa sigui bishitá nos dushi pais Kòrsou.