Rekonosementu otorgá na sra. Angeles Lopéz Isales pa 40 aña bishitando Kòrsou

WILLEMSTAD- 7 di ougùstùs 2016 - Sra. Angeles Lopéz Isales a hasi 40 aña bishitando Kòrsou. Esaki sigur ta motibu pa Ofisina di Turismo di Kòrsou (CTB) na nòmber di minister di Desaroyo Ekonómiko sr. Eugene Rhuggenaath duna sra. Lopéz Isales un rekonosementu.

Sra. Angeles Lopéz Isales ta ‘Dra. en Educación’ i a traha na diferente universidat na Puerto Rico. Den un forma masha kasual e la será konosí ku famia Baromeo na Puerto Rico i di ei e amistat di 40 aña i amor pa Kòrsou a nanse. Sra. Lopéz Isales ta bishita nos isla sigur 4 bia pa aña i a será hopi amistat ku diferente hende. Kasi tur evento importante na Kòrsou e la forma parti di dje manera entre otro: Festival di Tumba, Karnaval, Siman Santu, Pasku i kambio di aña. Sra. Lopéz Isales ta komprondé algu di papiamentu i ta durante su estadia riba nos isla so e ta bai laman, su trahe di baño ta warda aki na Kòrsou. E deseo di mas grandi di sra. Lopéz Isales ta pa e relashon di amistat entre Puerto Rico i Kòrsou sigui por medio di su yunan, nietunan i bisañetu. Sra. Lopéz Isales a resibu un plaka di rekonosementu i un reglando na nòmber di Kòrsou, isla ku e ta konsiderá su di 2 kas.