Rekonosementu spesial pa graduadonan den sektor di Turismo i Hospitalidat

WILLEMSTAD- 27 di yüni 2016 – Ofisina di Turismo di Kòrsou (CTB) un biaha mas a honra e mihó graduadonan den sektor di Turismo i Hospitalidat. E award di Dushi Hende a bai pa 12 hóben ku a sobresalí dor di terminá nan aña eskolar ku resultadonan ekstraordinario. Sr. Hugo Clarinda, Direktor interino di CTB i sr. Andre Rojer, Gerente di Merkadeo di CTB na Merka a hasi entrega di e award di Dushi Hende na e hóbennan.

Pa di 8 aña konsekutivo CTB ta pone lus riba e studiantenan ku a sobresalí den e aña eskolar ku a finalisá. E rekonosementu aki lo mester sirbi pa duna e studiantenan aki un èkstra motivashon pa nan kontinuá hasiendo nan máksimo esfuerso den nan próksimo estudio òf riba merkado laboral turístiko. Tambe e rekonosementu aki lo mester sirbi pa motivá e hóbennan ku aworakí ta siguiendo nan estudio den e direkshon di Turismo i/òf Hospitalidat pa próksimo aña eskolar nan por ta esun ku ta risibí e award di Dushi Hende.

E hóbennan ku a risibí e award di Dushi Hende ta hóbennan ku a bishitá diferente skol lokal i sigui nan estudio di Turismo i/òf Hospitalidat riba nivel di VSBO, SBO òf HBO. Ta trata di: Di-ángenni Fatima Gregorius (CDC), Fradjeska Manuela, Rosangelica Desbarida, Ysatis Gustina (Nilda Pinto SBO), Shayna Koempai (Jacques Ferrandi VSBO), Joel Hilker (Marnix VSBO), Rogino Vos i Suriviela Hooi (Maris Stella SBO), Luis Fernando Espinal Villareal (Maris Stella VSBO) i Elisa Samadhi Gabriela Everts i Aura Marcano (ICUC). CTB ta felisitá i yama danki na mayornan i dosentenan ku a guia e hóbennan aki pa nan por a alkansá nan meta. Masha pabien.