Road Show na Brazil pa presentá Kòrsou su produkto turístiko

WILLEMSTAD – 15 di yüni 2017 – Resientemente un tim di Kòrsou a partisipá na otro eksitoso road show na Brazil. E road show a konsistí di diferente aktividat tur ku e meta pa krea mas konsientisashon pa Kòrsou. Durante di e road show Ofisina di Turismo di Kòrsou (CTB) huntu ku sektor privá a topa ku 230 persona konsistiendo di e mayoristanan prinsipal di Brazil, agensianan di biahe i ehekutivonan di grupo di MICE.

Durante di e evento na hotèl Renaissance na São Paulo esnan presente a risibí informashon di Kòrsou su produkto turístiko via di un video interaktivo. Kòrsou komo destinashon turístiko den Karibe a bin ta hala hopi atenshon serka e bishitante brasilero. Na final di e seshon CTB a ofresé un almuerso na 60 persona influyente den e merkado di Brazil, kualnan tabatin oportunidat di interkambiá ku e hotèlnan presente.

Riba e di dos dia, a dediká tempu pa sera kontakto ku e mayoristanan presente. A konta ku presensia di entre otro: CVC, New Age, MMTGAPNET, Orinter, Decolar.com, Visual, Agaxtur, Schultz, Ancoradouro, Trend, Zarpo, Soul Travel i RCA. Finalmente riba e último dia, a reuní ku Flytour Viajes na unda CTB i demas partnernan a risibí presentashon di e feria turístiko Grand Feirao Flytour kual ta planiá pa tuma lugá na sèptèmber i òktober e aña aki ku partisipashon di aproksimadamente riba 80.000 bishitante.

E road show a konta tambe ku presensia di Marcelo Adnet, humorista renombrá mundialmente ku tin un simpatia inmenso pa Kòrsou i ku inkluso ta papia nos idioma papiamentu. E humorista a sa di konta su eksperensia ku nos isla. Esaki sigur tabata un punto ku a hala hopi atenshon durante di e road show. CTB ta gradisí partnernan, Renaissance Curaçao Resort & Casino, Hilton Curaçao, Santa Barbara Beach & Golf Resort, Papagayo Beach Hotel, Amalia Boutique Hotel, Blue Bay Curaçao, Sunscape Curaçao Resort, Spa & Casino i operadornan di tour, Scoobys Tours i Fiesta Tours pa nan partisipashon.