Roadshow di Kòrsou na Manaus, Brazil

WILLEMSTAD- 28 di mei 2015: Resientemente Ofisina di Turismo di Kòrsou huntu ku Insel Air i representantenan di sektor priva tabata na Brazil pa lansa e buelo nobo di Insel Air for di Manaus. Ta trata aki di un buelo direkto ku lo ser operá riba djamars i djasabra entrante 4 di yüli próksimo. E programa a inkluí tambe un sena di lansamentu. E evento a reuní representantenan di hotèl, operador di tour, kompania di aviashon Insel Air huntu ku mas di 100 agente di biahe i mayoristanan na Brazil.

E tim di Kòrsou a teneun sena kombiná ku un presentashon edukativo pa e grupo di agentenan di biahe i mayoristanan. Insel Air a duna detaye di e buelo nobo i vários partner den industria tabat’ei presente pa asina duna informashon di e produkto i servisionan ku nan ta ofresé. E partnernan aki ta: Avila Hotel, Renaissance Curaçao Resort & Casino, Lions Dive& Beach Resort Curaçao,ACOYA Hotel Suites & Villas, Papagayo Curaçao, Trupial Inn Hotel & Casino, Scooby Tours i Fiesta Tours. A para ketu na e playanan bunita di Kòrsou, e diferente hotèlnan ku tin riba nos isla, arianan pa hasi kompra, free zone, kasino, variedat di restorant, Kòrsou su bida nokturno i hopi mas. A hasi uso di e oportunidat pa mustra tur loke Kòrsou tin di ofresé komo destinashon turístiko.

Ademas e roadshow a konsistí di diferente bishita ku e partnernan presente a hasi na mayoristanan den e merkado di Manaus. Esakinan ta: CVC, Paradise Turismo, Amazon Explorers Turismo, Selenetur i BWT Operador.