Ruta nobo di American Airlines pa Kòrsou lo yuda desaroyá e merkado merikano

...E buelo nobo nònstòp for di Charlotte lo start entrante 19 di desèmber próksimo...
WILLEMSTAD- 13 yüli 2015 – Ofisina di Turismo di Kòrsou (CTB) a risibí e grato notisia ku entrante 19 di desèmber próksimo American Airlines lo start ku buelonan direkto for di Charlotte pa Kòrsou. “Kòrsou mester ta orguyoso mirando ku esaki ta un resultado direkto di e kompromiso i partnership entre American Airlines i Kòrsou pa sigui krese i bai e siguiente nivel den turismo huntu ku American Airlines. Charlotte ta ofresé servisio diario pa 40 pais rònt mundu kual lo habri konekshonnan internashonal pa Europa i Asia pa nos” asina Minister di Desaroyo Ekonómiko sr. Stanley Palm a duna di konosé.

CTB i American Airlines a bini ta traha pa basta tempu huntu riba diferente kampaña di promoshon pa alsa e kantidat di biahero pa Kòrsou. Un di e ehèmpelnan di esaki ta e kampaña ku resientemente American Airlines Vacations a lansa huntu ku Kòrsou komo partner mayó na 9 diferente estado stratégiko na Merka. CTB i CAP ku hopi orguyo a kolaborá na e kampaña aki kual a forma parti di e trayekto di promoshon i introdukshon di e produkto renobá di US Airways i American Airlines esta American Airlines Vacations (AAV).Charlotte ta un di e rutanan nobo di mas grandi di American Airlines despues di e union di American Airlines i US Airways. E ruta nobo lo start dia 19 di desèmber próksimo i lo ser efektuá semanalmente riba djasabra ku un airbus 319 kual tin un kapasidat di 128 stul. Benta di e ruta nobo lo start entrante 19 di yüli próksimo. Pa CTB e ruta nònstòp aki ta sigur un manera mas pa sigui desaroyá e merkado merikano mirando e kantidat di stul adishonal ku e ruta nobo aki ta trese pa Kòrsou.