Seaquarium Beach den kompetensia Mihó playanan den Karibe

...Vota pa Kòrsou riba wèpsait di USA Today...
WILLEMSTAD- 22 di yanüari 2015 – Kòrsou ta keda selektá un biaha mas den kompetensia ‘10 Best Readers Choice Travel Award’, e biaha aki den e kategoria ‘Best Caribbean Beach’. Kòrsou su Seaquarium Beach a kapta atenshon di e krítikonan di ‘USA TODAY’ komo un di e mihó playanan den Karibe. Tambe ta partisipando den e kategoria aki e.o: Baby Beach di Aruba, Cabbage Beach di Bahamas i Orient Bay Beach di St. Maarten. E wèpsait di ‘USA TODAY’ ta esun ku ta promové e kompetensia i ta habri votashon pa tur bishitante vota pa e mihó playa den Karibe.

Ofisina di Turismo di Kòrsou (CTB) ta ekstendé un invitashon na pueblo di Kòrsou pa vota pa Kòrsou i asina posishoná Seaquarium Beach komo e mihó playa den Karibe. Ta bon pa menshoná ku por vota tur dia. Pa depositá bo voto bishitá e wèpsait. Ora ku bo kaba di vota, ‘share’ bo voto via Facebook òf Twitter i asina sigui motivá mas hende pa vota pa Kòrsou. Por vota te ku djaluna, 2 di febrüari 2015 (promé ku 12’or di mèrdia) despues lo anunsiá e ganador riba e wèpsait di USA TODAY. CTB ta invitá un i tur pa bishitá e wèpsait di USA TODAY i ban vota pa Kòrsou!