Selebrashon Dia Mundial di Turismo 2016

...Turismo Pa Nos Tur...
Willemstad – 28 di sèptèmber 2016 – Den un ambiente dushi a selebrá Dia Mundial di Turismo na Ofisina di Turismo di Kòrsou (CTB). E aña aki Dia Mundial di Turismo a hiba di tema ‘Turismo Pa Nos Tur’. Ku esaki un bes mas ta suprayá e importansia di partisipashon di nos komunidat den nos industria di turismo. E selebrashon a konta ku presensia di e organisashonnan ku a forma parti di e kampaña di konsientisashon ku a keda lansá ku e tema ‘Turismo Pa Nos Tur’ i demas partnernan den sektor di turismo.

Komo parti di e kampaña un total di 30 kompania a keda aserká pa saka un potrèt di nan tim hasiendo uso di un frame grandi ku diseño di e kampaña. Durante di e selebrashon kada organisashon a risibí nan potrèt. E anochi a konta tambe ku músika i a rifa diferente premio bou di esnan presente. Resientemente a lansa tambe un billboard i un konvoi bou di e tema ‘Turismo Pa Nos Tur’.

CTB kier felisitá tur ku di un manera òf otro ta kontribuí na e sektor di turismo kual ta un di e pilarnan di nos ekonomia. Pabien Kòrsou!