Simposio pa operadornan di tour for di Merka i Canada

WILLEMSTAD- 2 desèmber 2015 – Di 1 pa 4 di desèmber Kòrsou ta anfitrion di ‘North American Tour Operator Symposium 2015’ (NATOS), ku ta konta ku partisipashon di 27 operador di tour for di Merka i Canada. Ofisina di Turismo di Kòrsou (CTB), Curaçao Hospitality and Tourism Association (CHATA) i partnernan den sektor privá i públiko a uni un bes mas pa realisashon di e simposio aki ku ta duna un kontribushon signifikante na desaroyo i kresementu di nos industria turístiko.

E simposio ta duna e partisipante oportunidat pa interkambiá di pensamentu ku CTB i partnernan den industria privá riba e produkto ku Kòrsou ta ofresé. Lo brinda e partisipantenan e oportunidat pa sera konosí mas di aserka ku Kòrsou. Tipo di simposio manera esaki ta importante pa asina e operadornan di tour por haña informashon di e produkto turístiko ku nos destinashon ta ofresé. E informashon aki ta balioso na momentu di prepará paketenan pa bende Kòrsou turístikamente. E simposio ta konta ku partisipashon di e siguiente operadornan di tour: Air Canada Vacations, American Airlines Vacations, Booking.com, Bookit.com, Cheap Caribbean, Expedia, General Wholesalers, Hotelbeds.com, Jetblue Getaways, Maduro Dive Fanta-Seas, Ocean Encounters Diving USA, Pleasant Holidays, Priceline.com, Sunwing Vacations, Teamamerica, Tourico Holidays, Transat Holidays, Travel Impressions i WestJet Vacations.

Durante di e apertura di e simposio e partisipantenan a haña un presentashon di e Master Plan pa Turismo ku ta kubri e periodo di 2015 – 2020 kual a keda presentá pa dr. Croes, un presentashon di e plan di merkadeo pa aña 2016 presentá pa CTB, CHATA a elaborá riba e produkto ku Kòrsou ta ofresé kaminda a para ketu entre otro riba e kantidat di kamber i atrakshonnan nobo, CPA a duna informashon di nan trabounan i e plan di ekspanshon i CAP a elaborá riba diferente punto ku tin di haber ku ‘airlift’ inkluyendo e trabounan di ekspanshon di nos aeropuerto ku ya ta den implementashon. E bishita di e operadornan di tour lo inkluí tambe un seshon di ‘Marketplace’ kaminda nan lo topa di forma individual ku partnernan den industria priva.

Un danki ta bai na tur e partnernan ku a yuda den realisashon di NATOS 2015 kualnan ta: Sunscape Curaçao Resort Spa & Casino, Hilton Curaçao, Avila Hotel, Pietermaai Smal, Curaçao Marriott Beach Resort & Emerald Casino, Blue Bay Resort, Business Serenity,

Fiesta Tours i FBTT.NATOS ta un esfuerso pa partnernan mantené i alabes establesé relashonnan internashonal ku gruponan for di Merka i Canada ku tin un impakto direkto pa nos industria turístiko.