Strongman Champions League

...pa promé biaha organisá na Kòrsou...
Willemstad – 30 di sèptèmber 2016 - Djasabra dia promé di òktober i djadumingu dia 2 di òktober, 12 di e hòmbernan mas fuerte na mundu lo enfrentá otro pa mira ken lo titulá kampeon. ‘The Strongman Champions League’ ta keda organisá na 15 pais rònt mundu, ku un total di 22 kompetensia. E kompetensianan por wòrdu mirá na 95 pais, ku un oudiensia di mas ku 1 miliart views pa aña. For di e aña aki- 2016, ‘The Strongman League’ tin su mes kanal ‘pay-per-view’ na unda ku por sigui kada kompetensia.

Pa e kompetensianan den òktober lo partisipá e mihó di e mihónan na mundu. Pa promé bes den historia, 2 atleta di Kòrsou lo kompetí; Marionchelo Soleana i Alex Power lo debutá. Den e kategoria di mas haltu, Kzysytof Radzikowski di Polonia i e Ulandes Alex Moonen tambe lo tei pa kompetí, for di Italia, Enzo Tauro i for di Bulgaria, Stojan Todorchev. Band’i e mihónan di mundu, Jimmy Paquet for di Canada, Simon Sulaiman di Siria, Aurelien Le Jeurne di Fransia, Dan Harrison di Merka, Joachim Gustavsson di Suisa i Marcos Ferrari di Brazil tambe lo tei. Ku partisipashon di e atletanan aki, e kompetensia lo ta unu fuerte i sigur yen di suspenso. Tur kos ta tuma lugá riba e beach di Mambo Boulevard.

E 12 partisipantenan lo kompetí den diferente kategoria:

  • Truck Pull (trèkmentu di un trùk ku peso di entre 12-20 tòn)
  • Boat Pull (trèkmentu di un boto for di awa ku peso entre 10-20 tòn)
  • Shot Put (tiramentu leu di un bala ku peso di 15 kilo)
  • Loading (karga 8 barí pisando 90 kilo kada un i pone riba un trùk)
  • Rock Lift (karga un blòki di mínimo 120 kilo riba kabes)
  • Forward Hold (mantené brasa mas tantu habrí wantando un dumbel di 30 kilo)

E kompetensianan ta wòrdu organisá dor di Sport & Gezondheidscentrum Physique di Hulanda den kolaborashon ku Dagelet Business Development NV, Curaçao Extreme Power Competition i Curaçao Tourist Board (CTB). E evento lo kuminsá 2’or di atardi riba ámbos dia i lo dura te mas ménos 5’or di atardi.

Paul Rabelink, direktor di Sport & Gezondheidscentrum Physique ta orguyoso di por organisá e kompetensia aki na Kòrsou. “Nos ta organisá vários kompetensia na Hulanda, pero organisá un evento asina’ki na Kòrsou, pa nos ta un gran honor. Sin e sosten di Dagelet Business Development, Curaçao Extreme Power Competition i CTB esaki lo no tabata posibel. Meskos ku na Hulanda, e kompetensianan ta kompletamente grátis pa públiko. E intenshon ta, pa nos organisá esaki den Karibe tur aña. E evento lo ta unu yen di suspenso i sigur un atrakshon pa grandi i chikí, pesei e invitashon pa Kòrsou asistí masalmente na Mambo Beach”, esaki di akuerdo ku Rabelink.