Turismo de estadia ta sigui impaktá nos ekonomia positivamente

...Turismo a generá 71 mion florin den luna di òktober 2015...
WILLEMSTAD- 3 di desèmber 2015 – Sifranan preliminar kolektá den luna di òktober ta indiká un kontribushon di 71 mion florin den nos ekonomia, esaki ta 1% di kresementu kompará ku aña pasa kaminda e montante generá tabata 70 mion florin. E echo ku ta poniendo mas énfasis riba Nort Amérika ku e kresementu den kantidat di buelo for di e region aki kombiná ku e kresementu fuerte for di Europa ta demostrando di ta eksitoso. No opstante e dòler fuerte ku ta afektando Colombia i Brazil nos a logra di oumentá e impakto finansiero pa Kòrsou. E impakto ekonómiko pa kada region ta lo siguiente:

Region

òktober 2015

òktober 2014

% Kambio

Europa

31.1

30.0

4%

Sur Amérika

22.4

25.8

-13%

Nort Amérika

10.2

7.5

37%

Karibe

4.4

3.5

26%

Otro

3.1

3.6

-15%

Total

71.2

70.4

1%

E sifranan menshoná ta na florin

E kantidat di turista di estadia registrá pa luna di òktober a konosé un bahada leve di 1% ku un total di 41.620 bishitante kompará ku aña pasa kaminda un total di 42.159 bishitante a keda registrá. E bahada aki ta komo konsekuensia di e kaida di e merkado di Sur Amérika, prinsipalmente Venezuela. Aunke ku a registrá un bahada den kantidat di turista di estadia, nos por mira si un oumentu leve den e ekonomia di nos pais.

Turismo di estadia for di e diferente regionnan:
Merkado di Europa a registrá 3% mas turista na luna di òktober. For di e region aki nos a risibí 16.805 turista di estadia kompará ku 16.256 na òktober 2014. Mirando ku e konfiansa di e biahero for di Hulanda, e pais for di kua nos ta risibí mas tantu turista, ta hopi haltu i e echo ku nan ta konsiderá Kòrsou komo un destinashon ku bon wer i solo ta pone ku nos ta mira un kresementu di 4% for di e pais aki. For di Alemania, CTB a registrá un kresementu leve di 1%. Den sifranan apsoluto nos ta papia di 1.957 turista aleman ku a bishita nos durante luna di òktober.

E region Norteamerikano na luna di òktober a konosé un kresementu di 35% ku un total di 5.166 turista, esaki tabata 3.819 aña pasá. Un kresementu di 26% a keda registrá for di Estado Unídos kual ta representá 4.351 turista di estadia. E esfuersonan di merkadeo hasí dor di sektor públiko i privá lo sigui pèrkurá pa resultadonan positivo for di e merkado di Estado Unídos. CTB ta komprometé na

alkansá kresementu sólido durante di henter aña for di e merkado aki, ku lo por kondusí na e kantidat di buelonan ku a keda pronostiká. E buelonan di Air Canada rouge henter aña for di Toronto ta sigui registrá kresementu eksepshonal. Un total di 815 kanades a bishitá nos pais durante luna di òktober.

Region di Sur Amérika a registrá un bahada di 14% na òktober 2015. Un total di 14.053 turista a bishitá nos pais kompará ku 16.347 na 2014. Venezuela a registrá un bahada di 15% den luna di òktober 2015. Dor di monitor e situashon na Venezuela durante di e último lunanan CTB ya a premirá e bahada for di e merkado aki pa kual motibu a kuminsá hinka e esfuersonan di merkadeo dene merkado di Colombia. Luna di òktober tráfiko for di Colombia a baha ku 24%. Aunke ku a pronostiká un kresementu for di e pais aki komo resultado di eliminashon di visa por konstatá ku e kambio di dòler ta haltu kual ta den nan desbentaha. Esaki ta e situashon tambe na Brazil, kual e luna aki a konosé un bahada di 29%. CTB ta sigui monitor e dos paisnan aki mirando ku nan ta potensialnan grandi for di region di Sur Amérika.

Karibe a registrá un oumento di 19%. Un total di 3.449 turista di estadia a keda registrá den luna di òktober. For di Aruba a registrá un kresementu di 3% ku un total di 1.754 turista di estadia. Trinidad & Tobago tambe a kontribuí na kresementu di e region di Karibe. Un total di 727 turista a bishitá nos na luna di òktober kual ta representá 129% kresementu kompará ku 2014.

Sifranan i impakto ekonómiko promé 10 lunanan di 2015
Pa loke ta e promé dies lunanan di 2015 turismo di estadia a krese ku 3% di 367.326 pa 379.277. Un total di 11.951 turista adishonal a bishita nos pais registrando kresementu for di Europa, Nort Amérika i Karibe. E regionnan a registrá kresementu di respektivamente 4%, 22% i 2%. Sur Amérika a registrá un bahada di 2% durante di e promé 10 lunanan di aña. E repartishon den merkadonan prinsipal ta, Europa 42.3% Sur Amérika 28.8%, Nort Amérika 17.1%, Karibe 7.6%, i otronan 4.3%.

Hasiendo uso di e modelo ‘Turistika’, CTB huntu ku MEO a kalkulá ku durante e promé dies lunanan di 2015, sektor di turismo a generá un impakto direkto di 659 mion florin pa nos ekonomia lokal. E montante aki ta representá un oumento kompará ku aña pasá kaminda un total di 620 mion florin a keda generá. Bishitantenan europeo ta responsabel pa 45.5% di e total. Tur huntu turistanan europeo a gasta 300 mion florin, siguí pa e turistanan for di e merkado di Sur Amérika ku 172 mion florin i esnan for di Nort Amérika ku 128 mion florin. E entradanan generá for di Karibe ta 37 mion florin.

Manera menshoná, e modelo ‘Turistika’ ta mustra ku sektor di turismo a generá un impakto direkto di yanüari pa òktober 2015 di 659 mion florin. E turista ta gasta su sèn primordialmente na akomodashon (36.2%), kuminda i bebida (24.0%), kompra (22.9%), transporte (9.3%) i impuestonan direkto (7.6%).

Download e sifranan